रविको मुद्दामा सक्कल मिसिल झिकाउने आदेश

राष्ट्रिय स्वतन्त्र पार्टी (रास्वपा)का सभापति तथा भूपू गृहमन्त्री रवि लामिछानेको सहकारी ठगीसम्बन्धी मुद्दामा अदालतले सक्कल मिसिल झिकाउन आदेश दिएको छ ।  

सहकारी ठगी, संगठित अपराध र सम्पत्ति शुद्धिकरणको मुद्दामा ६० लाख धरौटी माग्ने जिल्ला अदालत कास्कीको आदेशविरुद्ध रविले दायर गरेको पुनरावेदनउपर सुनुवाइ गर्दै उच्च अदालत पोखराले आज सक्कल मिसिल उपलब्ध गराउन भनेको हो । यो मुद्दा मुख्य न्यायाधीश डा.रत्नबहादुर बागचन्द र न्यायाधीश मिलनकुमार राईको संयुक्त इजलासमा सुनुवाइ भैरहेको छ । 

इजलासले २०८० असोज मा कास्की अदालतमा दायर भएको सहकारी ठगीसम्बन्धी मुद्दाको अभियोगपत्रसहितको सक्कल फाइल मागेको हो । रविविरुद्ध भने २०८१ मा पूरक अभियोग पत्र दर्ता भएको थियो । 

यसअघि अदालतले जिल्लाको आदेशको कैफियत प्रतिवेदन मागेकोमा बिहीबारदेखि सुनुवाइ हुँदैथियो । तर, शुक्रबार रविका वकिलहरुले पेशीबारे जानकारी नगराएको भन्दै न्यायाधीशको निष्पक्षतामाथि प्रश्न उठाएर 'रेक्युजल' मागेपछि विवाद भएको थियो । काठमाडौँबाट गएका वरिष्ठ अधिवक्ताहरू रमणकुमार श्रेष्ठ, सुशील पन्त र सुरेन्द्र थापाले 'इजलास हड्ताल' गरेपछि सुनुवाइ स्थगित भएको थियो । 

त्यसपछि अदालत प्रशासनले भैरहवा कारागारमा रहेका रविलाई पेशीबारे जानकारी दिन पत्र लेखेको थियो भने मुद्दा आजका लागि हेर्दाहेर्दैमा राखिएको थियो । यता रविकी पत्नी निकिता पौडेल लामिछानेले सर्वोच्च अदालतमा दायर गरेको बन्दीप्रत्यक्षीकरणको रिट लगातार चौंथो पटक हेर्न नमिल्नेमा परेको छ ।