आठौं पटक म्याद थपेपछि रविन्द्र मिश्रबारे भोलि सर्वोच्चमा बहस

प्रहरी हिरासतमा रहेका राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रलाई गैरकानूनी रुपमा थुनामा राखिएको भन्दै बन्दी प्रत्यक्षीकरणको रिट निवेदन दायर भएको छ । गत चैत १५ गते तीनकुनेमा भएको हिंसात्मक घटनामा संलग्न रहेको आरोपपछि उनी हिरासतमा छन् । 

मिश्रको तर्फबाट श्रीमती सारिका कार्कीले सर्वोच्च अदालतमा रिट निवेदन दर्ता गराएकी हुन् । उक्त रिटमाथि सुनुवाईका लागि अदालतले भोलि पेशी तोकेको छ । गृह मन्त्रालयलाई विपक्षी बनाएर दायर गरिएकोमा भोलि बिहान १० बजे उपस्थित हुन मन्त्रालयलाई तारेख पर्चा पठाइएको छ । 

दुर्गा प्रसाईं कमाण्डर रहेको राजावादीहरुको चैत १५ गतेको आन्दोलन हिंसात्मक बनेपछि मिश्रलाई सोही दिन प्रहरीले पक्राउ गरेको थियो । उनीमाथि राज्य विप्लव, संगठित अपराध र आपराधिक उपद्रव गरी तीन वटा कसुरमा अनुसन्धान भइरहेकोमा आज आठौ पटक म्याद थप गरिएको छ ।