विनोद चौधरीको अर्थपूर्ण विदेश भ्रमण, अपरान्ह नयाँ दिल्लीबाट आगमन

नेपाली काँग्रेसका सांसद तथा व्यापारी विनोद चौधरी नयाँ दिल्लीबाट अपरान्ह काठमाडौं आइपुगेका छन् । एअर इण्डियाको उडान नम्बर एआई २१५ मा आएका उनी सवा ४ बजे त्रिभुवन अन्तर्राष्ट्रिय विमानस्थलमा ओर्लिएको बताइन्छ । 

चौधरीसँगै प्रतिनिधि सभाका अर्का माननीय एकनाथ ढकालको विदेश यात्राबारे अनेकौं आशंका गर्न थालिएको धेरै भइसकेको छ । ढकाल ‘होली वाइन’ को नामले परिचित एमाले सांसद तथा नेपाल परिवार दलका अध्यक्ष हुन् ।

उनीहरुले हरियो र रातो रङ्गका राहदानी निजी काममा दुरुपयोग गरेको पाइएपछि प्रश्न उठाइएको हो । संसद अधिवेशन जारी रहेकै बखतसमेत व्यापारी र होली वाइनको मिसनमा लागेका सांसदहरु विदेश जाँदा संसद सचिवालयलाई जानकारी दिने गरेको पाइन्न । ढकालले गतसाता मात्रै पनि माल्दिभ्स पुगेर त्यहाँका सभामुख अब्दुल रहिम अब्दुल्लासँग  भेटवार्ता गरेका थिए ।

मैत्रीपूर्ण भ्रमणमा माले पुगेको भनिएका उनले सभामुख देवराज घिमिरेको तर्फबाट उताका सभामुख अब्दुललाई शुभकामना दिँदै सार्क मुलुकका सभामुख र सांसदहरु बीच आदानप्रदान बढाउनुपर्ने धारणा राखेको दाबी गरिएको छ । दुई मुलुकबीच सन् १९८० मा कूटनैतिक सम्बन्ध स्थापना भएको हो । 

ढकाल र ‘साहु’ चौधरीको एकपछि अर्को हुने गरेको विदेश यात्राको बारेमा प्रायःआधिकारिक जानकारी नहुने संसद सचिवालय स्रोतले यसअघि नै बताएको छ । चौधरीको पटक पटकको र ढकालको पछिल्लो माल्दिभ्स भ्रमणकै कुरो गर्ने हो भने यसको उद्देश्य,निमन्त्रणाबारे आफूहरु अनभिज्ञ रहेको सचिवालयका कर्मचारीहरुले बताएका छन् ।