चौधरीमाथि नक्कली बीमा दाबी गरेको आरोप, चार ठाउँमा उजुरी

सांसद तथा व्यापारी विनोद चौधरीविरुद्ध कारबाहीको माग गर्दै चार वटा निकायमा उजुरी दर्ता भएको छ । चौधरी र उनको व्यापाारिक समूह सिजी ग्रुपले गैरकानुनी काम गरेको दाबीसहित अख्तियार दुरुपयोग अनुसन्धान आयोग,सम्पत्ति शुद्धीकरण अनुसन्धान विभाग, राजश्व अनुसन्धान र राष्ट्र बैंकमा हिजोको मितिमा निवेदन दर्ता गराइएको हो । 

राजकुमार तिमल्सिनाले छानबिनमा हस्तक्षेप नगर्न सरकारी निकायहरुलाई आग्रह गरेका छन् । तिमिल्सिनाले यसअघि न्यायाधीश र केही ठूला मिडिया सञ्चालकको मिलेमतोमा बार्गेनिङ गरेको भनिएको अडियो सार्वजनिक गरेका थिए । उक्त अडियो फेक भएको प्रहरीले पुष्टि गरिसकेको छ ।

उनले सामाजिक सञ्जालमा लेख्दै युनाइटेड इन्सुरेन्सले सिजी इलेक्ट्रोनिक्समा आगलागी भएको नाममा ८४ करोड बीमा क्लेम गरेर ५९ करोड भुक्तानी लिएको दाबी गरेका छन् । क्षति भएको ३४ करोड तर ५९ करोड भुक्तानी लिएर २५ करोड झ्वाम बनाएको तिमिल्सिनाको दावी छ ।

सिजी ग्रुपअन्तर्गतका पाँच वटा कम्पनीमा २०१२ देखि २०२४ को बीचमा भएको आगलागीलाई प्राकृतिक विपत्ति हो कि मानसिक विपत्ति भन्ने उनको शंका छ ।

त्यसैगरी चकलेट र खाद्य उद्योगमा मिसावट, सिजी मोटरहरूमा भन्सार छुटको दुरुपयोग, राजनीतिक पहुँचद्वारा कर निर्धारणमा प्रभावलगायत आरोप छन्  ।