बेलुन विस्फोटका घाइते मेयर काममा फकिँदै
‘पोखरा भ्रमण वर्ष–२०२५’ को उद्घाटनका क्रममा बेलुन पड्किएर घाइते भएका पोखरा महानगरपालिकाका मेयर धनराज आचार्यले नियमित काममा फर्किने तयारी गरेका छन् ।
१२ दिनको अस्पताल बसाइँपछि आज पोखरा फर्किँदै गरेका उनले सामाजिक सञ्जालमार्फत नियमित काममा फर्किन लागेको जानकारी गराएका हुन् ।
उनले लेखेका छन्,‘आज १२ दिन लामो अस्पताल तथा आइसोलेशन बसाइँपछि म पोखरा फर्कँदै छु र नियमित काममा फर्कन तयारी गर्दैछु । जलनका कारण हुनसक्ने साइड इफेक्ट तथा आवश्यक स्वास्थ्य सावधानी कडाईका साथ पालना गर्नुपर्ने भएकाले तपाईंहरु सबैको सहयोगको अपेक्षा गर्दछु ।’
गत फागुन ३ गते भ्रमण वर्षको औपचारिक उद्घाटनका लागि आयोजित कार्यक्रममा बेलुन पड्किदाँ अर्थमन्त्री विष्णुप्रसाद पौडेल र मेयर आचार्य घाइते भएका थिए । उपचारका लागि उनीहरुलाई कीर्तिपुर बर्न अस्पताल भर्ना गरिएकोमा दुबैजना डिस्चार्ज भैसकेका छन् ।
तर, डिस्चार्जपछि मेयर आचार्यलाई भने आइसोलेशनमा राखिएको थियो ।
टिप्पणीहरू