प्रभु साहले अदालतको अवहेलना गरेको मेयरको दाबी

पूर्वमन्त्री समेत रहेका आम जनता पार्टी (आजपा) का अध्यक्ष प्रभु साहले अदालतको अवहेलना गरेको भन्दै नगरपालिकाका मेयर अदालत पुगेका छन् । रौतहटको बोधिमाई नगरपालिकाका मेयर प्रदीपकुमार यादवले साहविरुद्ध अदालतको अवहेलनामा कारबाही गर्नुपर्ने माग गर्दै अदालत गुहारेका हुन् ।

साहले केही दिनअघि सामाजिक सञ्जालमा ‘रौतहटका न्यायाधीश नेताका झोले कार्यकर्ता’ भनेर टिप्पणी गरेका थिए । उनले आफ्नो फेसबुकमा लेखेका छन्, ‘नेताहरुको झोले न्यायाधीशले रौतहट बदनाम एवम् अस्तव्यस्त भयो । बेईमान एवम् अयोग्य न्यायाधीशहरूलाई छानबिनको दायरामा ल्याउन म सम्माननीय प्रधानन्यायाधीशज्यूको विशेष ध्यानाकर्षण गराउँछु ।’

साहको उक्त स्टाटसले अदालतको अवहेलना भएको र न्यायाधीशको अपमान गरेको भन्दै मेयर यादव जिल्ला अदालत रौतहट पुगेका हुन् । अदालतका स्रेस्तेदार उद्धव ढोडारीका अनुसार मुद्दा दर्ता भइसकेको छैन । मुद्दा दर्ता सम्बन्धमा शुक्रबारदेखि छलफल भइरहेको बताए । अगाडि भने, ‘उहाँ अस्ति मुद्दा दर्ता गर्न अदालत आउनुभएको हो । अहिले मुद्दा दर्ता गर्ने कि नगर्ने ? भन्नेबारे छलफल भइरहेको छ । छलफलपछि मात्रै निर्णय हुनेछ ।’