रविलाई भोलि पोखरा फर्काइने, छविलाई चितवन पुर्याइयो
सहकारी ठगी मुद्दामा बयानका लागि कास्कीबाट काठमाडौँ ल्याइएका राष्ट्रिय स्वतन्त्र पार्टी (रास्वपा)का सभापति रवि लामिछानलाई भोलिमात्र पोखरा फर्काइने भएको छ ।
शुक्रबारदेखि शुरु भएको बयान आज सक्ने र साँझै पोखरा लैजाने प्रहरीको तयारी थियो । तर, बयान लम्बिएपछि कम्तिमा भोलिसम्म लामिछाने जिल्ला प्रहरी परिसर काठमाडौँको हिरासतमै रहने छन् ।
कालिमाटीस्थित स्वर्णलक्ष्मी सहकारीको बचत अपचलनसम्बन्धमा बयानको लागि बिहीबार काठमाडौँ ल्याइएका उनले शुक्रबार जिल्ला सरकारी वकिलको कार्यालयमा ६ घण्टा बयान दिएका थिए । हिजो शनिबार परेकाले बयान हुन सकेन ।
उता लामिछानेका तत्कालीन व्यवसायिक साझेदार पूर्वडिआइजी छविलाल जोशीलाई चितवन लगिएको छ । सहरा बचत तथा ऋण सहकारी संस्थाको रकम हिनामिनाको सम्बन्धमा बयानका लागि उनलाई आज पोखराबाट चितवन लगिएको हो ।
जिबी राई अध्यक्ष रहेको गोर्खा मिडिया नेटवर्क प्रालिमा पोखराको सूर्यदर्शन, काठमाडौँको स्वर्णलक्ष्मी, रुपन्देहीको सुप्रिम, चितवनको सहारालगायतका सहकारीबाट करोडौँ रकम गैरकानुनी ढंगले प्रवाह भएको संसदीय विशेष छानविन समितिको निचोड छ । त्यसबखत लामिछाने उक्त कम्पनीको प्रवन्ध निर्देशक र छविलाल उपाध्यक्ष थिए ।
टिप्पणीहरू