यस्तो छ, सिक्किममा उमा पक्राउ पर्नुको कारण

सिक्किममा पक्राउ परेकी नेपाली यूटुबर तथा भ्लगर उमा चाम्लिङ राईलाई थप केही दिन हिरासतमा राखेर अनुसन्धान गरिने भएको छ । 

सामाजिक सद्भाव बिथोल्न खोजेको अभियोगमा हिजो समातिएकी उनलाई थप पाँच दिन हिरासतमा राखेर अनुसन्धान गर्न अदालतले अनुमति दिएको हो । यो सँगै उमालाई हिरासतमै राखेर अनुसन्धान गरिने सिक्किम प्रहरीले जनाएको छ । 

यता, ‘साम्प्रदायिक हिंसा भड्काउन खोजेको’ आरोपमा उनलाई समातेर हिरासतमा राख्ने कदमप्रति मिश्रित टिप्पणी भइरहेका छन् । सामाजिक सञ्जालका प्रयोगकर्ता उमाको पक्ष र विपक्षमा विभाजित भएका हुन् । 

कतिपयले सिक्किमको राजनीतिक कित्ताबन्दीको शिकार उमालाई बनाइएको आरोप लगाएका छन् । सिक्किममा आउँदो वर्ष विधानसभा निर्वाचन हुँदैछ । जहाँ वर्तमान मुख्यमन्त्रीसमेत रहेका सिक्किम क्रान्तिकारी मोर्चाका पीएस गोले तामाङ र पूर्वमुख्यमन्त्री तथा सिक्किम डेमोक्रेटिक फन्टका पवन चाम्लिङ आपसमा प्रतिस्पर्धा गर्दैछन् । 

यहीबीच खोटाङ घर भएकी उमा अस्ति गान्तोक पुगेकी हुन् । साकेला नाच्ने भन्दै त्यहाँ पुगेकी उनले चार दिनअघि उनले फेसबुकमा भिडियो सार्वजनिक गर्दै आफू कार्यक्रममा भाग लिन जान लागेको जानकारी दिएकी थिइन् । 

तर, सत्तारूढ सिक्किम क्रान्तिकारी मोर्चाकी सदस्य शीला राईले उमाविरुद्ध साम्प्रदायिक हिंसा भड्काउन खोजेको आरोप लगाएर प्रहरीमा उजुर गरिन् । यहाँसम्म कि उमालाई पूर्वमुख्यमन्त्री पवन चाम्लिङको पक्षमा माहोल बनाउन प्रयोग गरिएको आरोपसमेत लगाइएको छ । 

सिक्किम क्रान्तिकारी मोर्चाले विज्ञाप्ति जारी गर्दै चाम्लिङको आडमा लेग्सेपमा पुस १४ गते साकेला मनाउन निमन्त्रणा दिएको र राजनीति प्रेरित भएर सर्वसाधारणलाई ध्रुवीकरण गर्न खोजेको आरोप लगाएको छ ।