कसरी जाँच्ने को लोकप्रिय, को अलोकप्रिय

‘हार्नुभन्दा छाड्नु राम्रो’ भन्दै एकथरी एमाले लाखापाखा लाग्दा अध्यक्ष केपी ओलीपक्षले आफू अनुकूल कमरेडलाई पहिलोपटक सजिलोसँग नेतृत्वमा स्थापित गराएको छ ।

अघिल्ला प्रदेश अधिवेशनमा त्यस्तो ठाउँ कहीँ पनि रहेन, जहाँ ओली पक्षले अर्को पक्षसँग प्रतिस्पर्धा गर्नु नपरेको होस् । अझ, प्रतिस्पर्धा मात्र नभई भएमध्येका अधिवेशनबाट दुई प्रदेशमा मात्र मूल नेतृत्व हात पारी अन्यमा गुमाउनुपरेको अवस्था छ । तर, विभिन्न पेशाकर्मीसहित बुद्धिजीवी, कर्मचारी संगठित हुने उपत्यका विशेष प्रदेश (पेशागत फाँट) को ओलीपक्षीय अर्थ मन्त्रालयका पूर्वकर्मचारी प्रेमप्रसाद पराजुली सर्वसम्मत भएका छन् ।

सचिवमा निर्विरोध निर्वाचित मिलन धरेल पनि सोही पक्षका हुन् । प्रेमको प्रतिस्पर्धीका रूपमा पर्यटन बोर्डका उपाध्यक्ष चन्द्र रिजाल खडा भएका थिए । उनलाई पार्टी उपाध्यक्ष विष्णु पौडेलको प्रेरणा थियो । प्रतिनिधिको मनस्थिति र अधिवेशनको माहोल हेर्दा हार्नेजस्तो देखेपछि चन्द्रले उम्मेदवारी फिर्ता लिए । र, ओली पक्षका निम्ति मैदान खालि भयो । 

सबैभन्दा रमाइलो त कर्मचारीमा भयो । निजामती कर्मचारी संगठनका पूर्व अध्यक्ष केदार देवकोटा आन्तरिक भोटिङमै पछारिए । निजामती क्षेत्रबाट मनोनीतसहित ३२ जनाबीच मतदान भएर त्यसबाट पाँच जना छान्नुपर्ने थियो । त्यो माइन्युटमा केदारले सही पनि गरेका थिए ।

तर, आफैंले १० भोट ल्याए । पेशागत महासंघको अध्यक्ष रहेका कर्मचारी संगठनका पूर्वअध्यक्ष पुण्य ढकालले ३१ मा ३१ सै मत पाए । केदार पुण्य अध्यक्ष रहेको पेशागत महासंघका महासचिव हुन् । उक्त नतिजा देखेपछि पुण्य मलाई मत नदिने त्यो १ जना को हो भनी खोज्दै हिँडे भने १० मत पाएका केदार यस्तो पनि हुन्छ ? भनी फेसबुकमार्फत् कुर्लिन थाले । आइतबार दिउँसो ४ बजेदेखि राति १२ बजेसम्म गलफत्ती गरेर उनी प्रदेश कमिटीको सदस्यमा आउन सफल भएका छन् । 

यसरी विष्णु पौडेल बौरिएर आउनुको कारणबारे उनैले निकटस्थसँग भन्ने गरेका छन्, ‘अहिले जसरी पार्टी चलाएर ०८४ को चुनाव थेग्न गाह्रो हुन्छ । ०८४ मा हामीले जे भनेर कल्पना गरेका छौं, त्योअनुसार लिडरसिप आउँदैन !’ भर्खरै बागमती प्रदेशको अध्यक्षमा कृष्ण दाहाल हारेलगत्तै पार्टीमा निस्क्रिय रहेको खबर बालकोट पुगेको छ ।

यसबारे स्वयं दाहालले भन्ने गरेका छन्, ‘म बालकोट गएको छैन, भेटेको छैन, त्यसैले सक्रिय छैन भनेछन्, मध्यराति गएर ५ घण्टा कुर्‍या , ५ मीनेट भेटेर आउनेलाई सक्रिय छ भनेर हाजिरी जनाइने चलन रहेछ ।’ मैदानमा काम गर्दाभन्दा बालकोटमा धाए देखिने र मूल्यांकन हुने परिपाटीको विरोध गर्दै उक्त कुरा बताएका हुन् ।