जलहरी काण्डको छानबिन गर्दागर्दै जसले गुमाए ज्यान

गत बिहीबार राति घरमा सुविस्तासङ्ग सुतेका सहसचिव शेरजंग कार्की अस्ति बिहान बेडमा सुतेको अवस्थामा मृत भेटिएका छन् । कानुन मन्त्रालयका वरिष्ठ सहसचिव कार्की बबरमहलस्थित घरमा बितेका हुन् ।  

ओखलढुंगा पुर्ख्यौली थलो रहेका उनी केही समय अघिसम्म अख्तियार दुरुपयोग अनुसन्धान आयोगमा कार्यरत थिए । हालै मात्र राष्ट्रपति कार्यालयमा सरुवा भएका हुन् । बिहीबार राति सुतेका कार्की शुक्रबार बिहान ७ बजेसम्म नउठेपछि वरिष्ठ अधिवक्ता भीमार्जुन आचार्यले गाडीमा राखेर नर्भिक अस्पताल पुर्याएको बताइन्छ । आचार्य र कार्की छिमेकी हुन् । 

अस्पताल पुर्याइएलगत्तै उनलाई मृत घोषणा गरिएको थियो । विभिन्न समारोहमा सहभागी हुँदा ‘सोसल ड्रिंकर’ भए पनि ५२ वर्षे कार्की स्वस्थ देखिन्थे । उनको निधनमा हृदयाघातको सम्भावना औंल्याइएको छ ।

हिजो पशुपतिमा अन्त्येष्टि गरिएका स्वर्गीय कार्की पशुपतिकै जलहरी काण्ड छानबिनमा संलग्न थिए । झण्डै १० किलो सुनको हिसाब गायब भएको भनिएको उक्त काण्डको छानबिनमा सहभागी भएकाले कार्कीले तनावमा दैनिकी बिताउँदै आएका थिए भन्नेहरु पनि छन् ।