हिजाब नलगाउने महिलालाई बैंक सेवा दिने म्यानेजरको जागिर चैट

हिजाब नलगाएकी महिलालाई बैंकिङ सेवा दिएको आरोपमा इरानको एउटा बैंकका प्रबन्धकलाई बर्खास्त गरिएको छ । राजधानी तेहरान नजिकैको कोम प्रान्तमा ती प्रबन्धकले हिजाब नलगाउने महिलालाई बैंक सेवा उपलब्ध गराएका थिए ।

‘उनलाई गभर्नरको आदेशपछि पदबाट हटाइयो’ डेपुटी गभर्नर अहमद हाजिजादेहलाई उद्धृत गर्दै स्थानीय समाचार संस्थाले जनाएको छ । इरानका अधिकांश बैंक राज्य–नियन्त्रित छन् । 

हिजाब कानून लागू गर्ने त्यस्ता संस्थामा व्यवस्थापकहरु नै जिम्मेवार हुने कानुन बनाइएको छ । इरानका महिलाले आफ्नो टाउको, घाँटी र कपाल अनिवार्य रुपमा छोप्नुपर्छ । इरानाको जनसंख्या ८ करोड बढी छ ।

गत सेप्टेम्बरमा एक युवतीले हिजाब नलगाएको आरोपमा प्रहरीले पक्राउ गरेको थियो । उनको हिरासतमै मृत्यु भएपछि देशभर हिजाबविरोधी प्रदर्शन चर्किएको छ । प्रदर्शनमा सयौं सर्वसाधारणको ज्यान गएको छ ।