भारतबाट चामल पनि नआउने, कृषि पेशा छाडेर लाहुरे संस्कृति अंगालेकाले सबैको बिजोग हुने

भारतले चामलको निर्यात व्यापारमा प्रतिबन्ध लगाउने तयारी थालेको छ । पर्याप्त घरेलु आपूर्ति सुनिश्चित गर्न र मूल्यवृद्धि रोक्न चामल निर्यातमा प्रतिबन्ध लगाउन प्रक्रिया शुरु गरिएको हो ।

उत्पादन कम भएपछि मूल्य बढेको भन्दै भारत सरकारले गहुँ र चिनीको निर्यात व्यापारमा रोक लगाइसकेको छ । भारतको प्रधानमन्त्री कार्यालयमा रहेको उच्चस्तरीय कमिटीले बजारमा मुलुकभित्र उत्पादित खाद्यान्नको आपूर्ति र उपलब्धताको अध्ययन गरेर चामल निर्यातमा प्रतिबन्ध लगाउने तयारी गरेको हो ।

भारतमा हाल उपभोग्य वस्तुको मूल्यवृद्धि उच्च भएको छ । चामलको मूल्य पनि यही रुपमा बढे निर्यात प्रतिबन्ध लगाउने बताइएको छ । भारतले चामल निर्यातमा रोक लगाए यसको ठूलो असर नेपालमा पर्ने देखिन्छ । भारतले यसअघि नै चिनी र गहुँको निर्यात व्यापारमा रोक लगाउने निर्णय गरिसकेको छ ।

कोरोना महामारी, युक्रेन युद्ध र विश्वमा आएको कृषि उत्पादन ह्रासलाई दृष्टिगत गरि विश्वका अधिकांश मुलुकले खाद्य सुरक्षाको प्रबन्ध मिलाउन थालेका हुन् । तर नेपालमा कृषि उत्पादन हुन छाडेको छ भने विदेशबाट महँगोमा किनेर उपभोग गर्ने लाहुरे संस्कृति भित्रिएकाले निकट भविष्यमा ठूलै संकट आउनसक्ने आकलन गरिएको छ ।