केपी ओलीद्वारा नियुक्त जीएमको पनि उही पारा

अघिल्लो सरकारको नेतृत्व गर्नुभएका एमाले अध्यक्ष केपी शर्मा ओलीले विभिन्न संघ, संस्थामा नियुक्त गर्नुभएका दुर्गा प्रसाईं मार्सीजस्ता केन्द्रीय सदस्य र सरकारी हाकिमहरुको प्रवृत्ति ठ्याक्कै मिल्दोजुल्दो पाइएको छ । नेपाल रेल्वे कम्पनीमा महाप्रबन्धक नियुक्त गुरु भट्टराईको दैनिकी नै सामाजिक सञ्जालमा ओली बाहेकका नेतालाई आमचकारी गाली गर्नु थियो ।

सरकारी कोषबाट तनखा बुझ्नेहरुले कम्तिमा सरकारी ओहोदामा बसुञ्जेल त्यस्तो पदीय मर्यादाविपरितका कार्य गर्न नहुने आवाज उठे पनि उनी सबैलाई भाग पुग्नेगरी २४ घण्टामा २४ भन्दा बढी स्टाटस र फोटो अपलोड गरेर बस्थे । पाएसम्म अन्य नेतालाई गाली गर्ने,नपाए एमाले अध्यक्षको गुणगान गाउने उनको ठेक्कै थियो ।

‘बालेनले ३० हजार भोट कटाए भने ३० दिन काठमाडौं बस्दिन । मैले बिर्सें भने सम्झाइदिनु है, प्लिज ।’

अहिले त्यो लाइनमा नेपाल वायुसेवा निगमका महाप्रबन्धक देखिएका छन् । महाप्रबन्धक डिमप्रकाश पौडेलले गणना भइरहेको काठमाडौैं महानगरपालिकाको परिणामको बारेमा सामाजिक सञ्जालमा लेखेका हुन् । उनले लेखेको उक्त स्टाटस अहिले उनकै निम्ति गलपासो सावित भएको छ ।

महानगरमा स्वतन्त्र उम्मेदवार बालेन साहले अग्रता लिँदा उनको स्टाटस फेल खाएको हो । उनले लेखेका छन्, ‘बालेनले ३० हजार भोट कटाए भने ३० दिन काठमाडौं बस्दिन । मैले बिर्सें भने सम्झाइदिनु है, प्लिज ।’

एक लाख बढी मतगणना हुँदा बालेनले ३९ हजार मत कटाएका छन् । अझै ९० हजार मत गणना हुन बाँकी छ । कम्तिमा पनि ५० हजार मत कटाउने अवस्था बन्दै गएको छ ।

अब पौडेल अहिले नै काठमाडौं बाहिर जानुपर्छ कि पर्दैन होला ? निगमको एउटा कर्मचारी युनियनका एक जना कर्मचारीले प्रतिप्रश्न गरेका छन् । ‘उनले अब बाहिर गएको सूचना दिने कि नदिने ? होइन भने निगममा छिर्न नदिएझैँ आफ्नै लेखाइका कारण कमचारीले काठमाडौंबाट खेद्न नपरोस्,’ उनले भने ।