सम्भावित क्षतिबाट मुलुकलाई जोगाइएको नेकपा एकीकृत समाजवादीको निचोड
नेकपा एकीकृत समाजवादीले एमसीसी सम्झौतालाई संसदबाट अनुमोदन गर्ने विषयमा पार्टीले सुझबुझपूर्ण निर्णय गरेको निश्कर्ष निकालेको छ । हिजो सम्पन्न पार्टीको पोलिटब्युरो बैठकले यस्तो निश्कर्ष निकालेको हो ।
व्याख्यात्मक घोषणासहित एमसीसी पारित हुँदा पार्टीले उठाइरहेको सवाल राष्ट्रिय अडानको रुपमा परिणत भएकाले मुलुकमा हुनसक्ने सम्भावित क्षति रोकिएको महासचिव वेदुराम भुसालले जारी गरेको प्रेस नोटमा उल्लेख छ । एमसीसीलाई सफल अवतरण गराएर पार्टी र देशमा हुनसक्ने सम्भावित क्षति रोकिएको दाबी समाजवादीले गरेको छ ।
त्यसअघि बैठकमा राजनीतिक प्रतिवेदन पेश गर्दै अध्यक्ष माधवकुमार नेपालले एमसीसी सम्झौता संसदबाट अनुमोदन गर्दा पार्टीको अडान नछोडेको बरु देशको परिस्थितिलाई मध्यनजर गर्दै गठबन्धनलाई साझा निर्णयमा उभ्याउन सफल भएको बताउनुभएको थियो । ‘हाम्रो पार्टी न कसैसँग झुक्छ, न कुनै कुरामा बहकिन्छ, जहिले पनि देशको हितलाई केन्द्रबिन्दुमा राखेर काम गर्छ’, उहाँले भन्नुभएको थियो ।
गठबन्धन बनाउन र निरन्तरता दिन पार्टीले खेलेको भूमिकाबारे अध्यक्ष नेपालले चर्चासमेत गर्नुभएको थियो । पोलिटब्युरो बैठकमा अध्यक्ष नेपालले पार्टीको सम्पूर्ण शक्तिलाई पूर्ण उत्साहका साथ क्रियाशील हुन र आफूले प्राप्त गरेका उपलब्धिप्रति गौरव गर्न पनि आग्रह गर्नुभएको थियो । उहाँले सम्पूर्ण पार्टी पंक्तिलाई आसन्न स्थानीय तहको निर्वाचनमा परिचालित हुन आह्वान गर्नुभयो ।
भोलि र पर्सि बस्ने केन्द्रीय कमिटी बैठकमा पेश गर्ने राजनीतिक प्रतिवेदनमाथि हिजोको पोलिटब्युरो बैठकमा छलफल भएको बताइएको छ । नेपालले पेश गरेको राजनीतिक प्रतिवेदनमा ३७ जना सदस्यहरुले टिप्पणी गरेका थिए । प्रतिवेदनमाथि टिप्पणी गर्दै सदस्यहरूले संगठनलाई व्यवस्थित गर्न पार्टी तथा जनवर्गीय संगठन सबैलाई सक्रिय बनाउनुपर्नेमा जोड दिएको बैठकमा सहभागी एक नेताले बताएका छन् । एमसिसीबारे मतभेद भए पनि पार्टी निर्णयलाई आत्मसात् गर्दै अगाडि बढ्न सदस्यहरूले सुझाव दिएको उनले जानकारी दिए ।
बैठकमा अध्यक्ष नेपालले पार्टी पुनर्गठनदेखि हालसम्मका संगठनात्मक कार्यहरुको समीक्षा, वर्तमान राष्ट्रिय राजनीतिक परिस्थितिको विश्लेषण, आगामी निर्वाचन र आगामी कार्ययोजना समेटिएको राजनीतिक प्रतिवेदन प्रस्तुत गर्नुभएको थियो । पोलिटब्युरो सदस्यहरुले दिएका सुझावको आधारमा अध्यक्ष नेपालले राजनीतिक प्रतिवेदन परिमार्जनसहित केन्द्रीय कमिटी बैठकमा पेश गर्ने कार्ययोजना छ ।
टिप्पणीहरू