पत्रकार एलबीको निधनमा प्रेस काउन्सिलको चासो

प्रेस काउन्सिल नेपालले सिभिल अस्पतालमा उपचार नपाएर पत्रकार लालबहादुर (एलबी) विश्वकर्माको निधन भएको विषयमा छानबिन गरी सत्यतथ्य सार्वजनिक गर्न माग गरेको छ ।

विश्वकर्माको रकम अभावका कारण बिहीबार बिहान निधन भएको बताइएको छ । सो सम्बन्धमा काउन्सिल अध्यक्ष बालकृष्ण बस्नेतसहितको टोलीले अस्पताल व्यवस्थापनसँग भेटेर घटनाको छानबिन गरी दोषीमाथि कारबाही गर्न माग गरेको हो ।यसैबीच काउन्सिलले आज टिभी टुडे एचडीको कार्यालयको पनि अनुगमन गरेको छ । काउन्सिल अध्यक्ष बस्नेत, सदस्यद्वय ठाकुरप्रसाद बेलबासे र दीपक पाण्डेसहितको टोलीले टिभी टुडेको पेप्सीकोलास्थित कार्यालयमा पुगेर कर्मचारीको तलब, सुविधाका विषयमा जानकारी लिएको हो ।

पछिल्लो पाँच महिनादेखि टिभी टुडेमा कार्यरत बिश्वकर्मा बिरामी परेको समयमा कार्यरत संस्थाले तलब, सुबिधा उपलब्ध नगराएको गुनासो आएपछि अनुगमन गरिएको प्रेस काउन्सिलले जनाएको छ ।

श्रमजीवी पत्रकार अस्पतालमा पुगेपछि पनि उपचारको अभावमा ज्यान गुमाउनु लज्जाको विषय भएको काउन्सिलले विज्ञप्तिमा उल्लेख गरेको छ ।