पासपोर्ट बनाइदिनेहरु नै कोरोनाको पेलानमा,काममा कटौती

परराष्ट्र मन्त्रालयको त्रिपुरेश्वरस्थित राहदानी विभागमा अस्तव्यस्त अवस्था उत्पन्न भएको छ । इ–पासपोर्टको शुभारम्भसँगै कोरोनाको नयाँ भेरिएण्ट अधिकांश कर्मचारीमा सरेअछि पासपोर्टको आवेदन,तयारी र वितरण प्रक्रिया नै अवरुद्ध भएको हो ।

विभागका अधिकांश कर्मचारी कोभिडको आशंकामा त्राहिमाम भएका छन् । झण्डै ७० जना कर्मचारी रहेको विभागमा हिजो दिउँसोसम्म अफिसर सविता नकर्मीलगायत १० जनामा पुष्टि भइसकेको छ । अरुलाई कन्ट्याक्ट ट्रेसिङमा पठाइएको छ । एउटा ठूलो हलमा काम गरेका कारण धेरै जना एकै पटक संक्रमित भएको बताइन्छ । उनीहरुको पनि रिपोर्ट पोजिटिभ आएको अवस्थामा कम्तिमा सात दिन आराम गर्न दिनुपर्ने हुन्छ । त्यसो हुँदा राहदानी वितरण प्रक्रिया थप अप्ठेरोमा पर्ने अवस्था सिर्जना भएको हो ।

विभागको ठूलो हलमा १७ जनाले राहदानीको काम गर्दै आएका छन् । मूलतः उनीहरुले फोटो खिच्ने र सेवाग्राहीसँग नजिक रहेर काम गर्नुपर्ने हुन्छ । अहिले त्यो काम मुश्किलले तीन जनाले गरेका छन् । त्यो पनि डराइ डराइ गर्नु परेकाले काममा कुनै तदारुकता नदेखिएको विभागको भनाइ छ । यतिखेर पहिले बुकिङ लिएकालाई मात्र राहदानीको निम्ति बोलाउन सक्ने अवस्था उत्पन्न भएको हो ।

विभागको उक्त हलमा राहदानी आवेदकको मास्क खोलेर फोटो खिच्नुपर्ने भएकाले त्यो ठाउँ कोरोना उत्पादनको कारखाना जत्तिकै भएको हो । कन्सुलर सेक्सनतर्फ भने मास्क लगाएर काम गर्न मिल्ने भएकाले कम जोखिम देखिएको हो । विभागतर्फ फोटो खिच्नुपर्ने भएकाले संक्रमणको सम्भावना बढेको हो ।

विभागको पछिल्लो कहालीलाग्दो अवस्थाको बारेमा मन्त्रीसम्म कुरो पुगे पनि खासै केही निर्देशन नआएको स्रोतले बताएको छ । अर्कोतर्फ, भद्रगोल पारा देखेपछि सेवाग्राहीले स्वास्थ्य मापदण्ड पालना नभएको भन्दै चर्को बिरोध र आलोचना गर्ने गरेका छन् ।

पछिल्लो अवस्थालाई ध्यानमा राखेर विभागले इमेलबाट कागजपत्र बुझ्ने व्यवस्था मिलाउने बारेमा पनि सोचेको बताइन्छ । तर,त्यसतर्फ खासै काम अघि बढेको छैन ।

संक्रमण फैलनुअघि विभागले दैनिक १ हजारदेखि ११ सय थानसम्म इ–पासपोर्ट वितरण गर्ने गरेको थियो । महामारीको भयावह अवस्थाका कारण उक्त संख्या घटेर आधामा सीमित हुने देखिएको छ । पछिल्ला दिन विभागमा तीन हजारभन्दा बढी सर्वसाधारणको ओहोरदोहोर देखिएको थियो । यता सरकारले २५ जनाभन्दा बढी एक ठाउँमा जम्मा नहुन निर्देशन दिएकाले थप भद्रगोलको अवस्था देखिन लागेको हो ।