पहिले सडक ठप्प अफिस खुल्ला, अहिले अफिस बन्द अन्यत्र खुल्ला

कोरोना महामारीको तेस्रो लहरका कारण विश्व पुनः एक पटक त्राहिमाम बनेको छ । विश्वका अधिकांश मुलुकमा महामारीबाट संक्रमित हुनेको संख्या तीब्र गतिमा बढिरहेको छ ।

नेपालमा पनि संक्रमणको दर तीव्र गतिमा अघि बढिरहेको छ । स्वास्थ्य तथा जनसंख्या मन्त्रालयले सार्वजनिक गरेको पछिल्लो तथ्याङ्कअनुसार मुलुकभर सक्रिय संक्रमितको संख्या झण्डै ३१ हजार पुगेको छ ।

संक्रमण बढ्दै गर्दा अधिक जोखिम देखिएका सरकारी कार्यालय र निकायहरु धमाधम बन्द हुन थालेका छन् । यसअघि पहिलो र दोस्रो लहरको महामारीको समयमा सर्वसाधारणलाई बाहिर निस्कन प्रतिबन्ध लगाइएको थियो । यस पटक भने त्यसको ठीक विपरीत अवस्था देखा परेको छ ।

पहिलो र दोस्रो लहरको संक्रमणमा सरकारले लकडाउन तथा निषेधाज्ञा जारी गर्दा कार्यालय तथा सार्वजनिक सेवाका कार्यालयहरु भने खुल्ला थिए । तर त्यहाँ जाने सेवाग्राहीको संख्या नगण्य देखिन्थ्यो ।

अहिले भने सरकारले हालसम्म निषेधाज्ञा जारी गरेको छैन । यदाकदा स्थानमा स्मार्ट लकडाउन भने पनि त्यसको कुनै पालना देखिँदैन । बरु सरकारले निषेधाज्ञा जारी नगर्दै केही कार्यालय र सरकारी निकायहरु बन्द हुन थालेका छन् । कर्मचारीमा संक्रमण देखिएको भन्दै धमाधम कार्यालयहरु बन्द गरिएका हुन् ।

अस्पतालहरुमा पनि चिकित्सक तथा स्वास्थ्यकर्मीहरुमा संक्रमण देखिएकाले अत्यावश्यक बाहेकका सेवा बन्द गर्न थालिएको छ । यस्तै, कर्मचारीमा कोरोना देखिएका सरकारी कार्यालय, पालिका, बैंक तथा सरकारी निकायहरु निषेधाज्ञा नहुँदै सीमित अवधिका लागि बन्द गरिएको छ ।

हालसम्म प्राप्त जानकारीअनुसार धरान उपमहानगरपालिकाको वडा नम्बर ११ र २० को कार्यालय बन्द भएका छन् । कर्मचारीमा संक्रमण देखिनुका साथै समुदायस्तरमा समेत संक्रमण बढेको भन्दै गत बुधबारबाट ती कार्यालय बन्द भएका हुन् ।

यस्तै, राष्ट्रिय वाणिज्य बैंक सुर्खेत शाखा, अर्घाखाँचीको सन्धिखर्क नगरपालिका, यातायात कार्यालय बुटवल, भेरी अस्पतालको ओपिडी सेवा, कोशी अस्पतालको ओपिडी सेवा, त्रिवि शिक्षण अस्पतालको आईसीयू वार्ड बन्द भएका छन् ।

महामारीको कारण देखाउँदै अर्घाखाँचीको सन्धिखर्क नगरपालिका तीन दिन, यातायात कार्यालय बुटवल चार दिनका लागि बन्द भएका हुन् । यसअघि भने पहिलो र दोस्रो लहरको महामारीका समयमा स्थानीय तह तथा सरकारी निकायहरु बन्द भएका थिएनन् ।

अस्पतालको हकमा भने यसअघि पनि चिकित्सकहरुमा संक्रमण देखिँदा अत्यावश्यक सेवा मात्र सञ्चालन गरिएको थियो । स्वास्थ्य तथा जनसंख्या मन्त्रालयका सहप्रवक्ता डा. समिरकुमार अधिकारीका अनुसार भने यस पटक अस्पतालका सेवा बन्द नगर्न सबै अस्पताललाई निर्देशन दिइएको छ । तर, चिकित्सक तथा स्वास्थ्यकर्मी नै संक्रमित हुँदा अत्यावश्यक बाहेकका सेवा भने बन्द हुन थालेका छन् ।