बाढी पीडितलाई ‘हङकङ’ को धान सहयोग

गत कात्तिक महिनामा परेको अविरल वर्षासँगै मावा खोलामा आएको बाढीबाट पीडित बनेका मोरंगको उर्लाबारी–९ का कृषकलाई राहत प्रदान गरिएको छ ।

राजघाट हङकङ समाजको सहयोगमा उर्लाबारीस्थित चक्रेटोल, फाईबेलीडाँडा, बोर्डर लाईन र माहारास्थानमाका बाढी पीडितलाई राहत प्रदान गरिएको हो ।

बाढी पीडित प्रतिघरलाई पाँच मनको दरले धान सहयोग गरिएको राहतको लागि पहलकर्ता समिर तुम्बाहाम्फेले बताए । उनका अनुसार अति विपन्न तथा पीडित ४३ घर परिवारलाई सहयोग गरिएको छ । ‘यसपटक अन्नबाली पानी, झरी र बाढीले बगाएपछि खान नपाइने चिन्ता थियो,’ राहत लिँदै स्थानीय चक्र राईले भने, ‘पाँच मन धान पाइयो, अब भोकै नहुने भइयो । अरु त जेनतेन गरेर चलाइ हालिन्छ ।’

राहत पाउनेहरू प्रायः निक्कै खुशी देखिएका छन् । वास्तवमा कृषकको पीडामा कसैले पनि चासो देखाएको पाईंदैन । उनीहरू जहिले पनि सिजनमा मल नपाएर हैरान हुन्छन् । कहिले बीऊ विजनको अभाव झेल्छन् ।

कहिले बाली राम्रोसँग सप्रिँदैन त कहिले भएको बाली नी सबैले बाढीले बगाइदिन्छ, असिनाले पनि सखाप पारिदिन्छ । यहि पीडालाई मध्यनजर गर्दै आफ्नो गाउँको पीडालाई आफ्नै पीडा सम्झेर सहयोग गरेको राजघाट हङकङ समाजका अध्यक्ष खबिराज लिम्बुले बताए ।

उनले भने, ‘गाउँघरमा भएको यति ठूलो क्षति र पीडामा कहाँ हाम्रो मन मान्छ र । त्यसैले सकेको सहयोग गरेका हौं । भइपरी आउने समस्यामा सहयोग गर्न हामी तैयार छौं ।’ राहतका लागि सहयोग संकलनमा सक्रिय राकेश पोमुले सहयोग गर्न पाउँदा खुशी लागेको बताए ।