प्रधानमन्त्रीको बिदाइ सिष्टम फेरियो,विमानस्थलमा तामझाम नगर्न निर्देशन
प्रधानमन्त्री शेरबहादुर देउवा स्कटल्याण्डको ग्लास्गोमा हुने जलवायु परिवर्तनसम्बन्धी विश्व सम्मेलन COP 26 मा भाग लिन आज त्यसतर्फ प्रस्थान गर्दै हुनुहुन्छ । नोभेम्बर १ र २ का दिन उक्त सम्मेलनमा भाग लिएर उहाँ स्वदेश फर्किने कार्यक्रम छ ।
पाँचौं पटक प्रधानमन्त्री हुनुभएका देउवाले यसपटक सरकार प्रमुखलाई विमानस्थलमा गरिने पहिलेको जस्तो औपचारिक बिदाई र स्वागतको तामझाम नगर्न निर्देशन दिनुभएको बताइन्छ ।
प्रधानमन्त्री कार्यालयले आज विमानस्थलमा सलामी, औपचारिक उपस्थितिजस्ता केही पनि तडकभडक नगर्न आदेश दिएको छ । उच्च स्रोतका अनुसार आज प्रधानमन्त्रीले विमानस्थलबाट विमानतर्फ जाँदा त्यहाँको भीभीआईपी कक्ष प्रयोग गर्नु हुने छैन ।
सम्भवतः उहाँ सवारी साधनमा सोझै विमानसम्म पुग्नुहुनेछ । अर्को स्रोतले भनेको छ, ‘सेनाले सलामी दिने ठाउँ भएर जानु हुनेछ, तर औपचारिक केही पनि नगर्ने भनिएको छ ।’
यसभन्दा पहिले यसरी सरकार वा राष्ट्र प्रमुख विदेश भ्रमणमा जाँदा अतिविशिष्ट कक्षमा आराम र चियापान हुन्थ्यो । त्यसपछि सलामी लिएर विमानस्थलतर्फ जाने काम गरिन्थ्यो । तर,आज बिदाईको लागि सबै जनालाई ताँती लागेर विमानस्थलमा नआउन भनिएपछि प्रधानमन्त्रीको बिदाईको सिष्टम फेरिएको हो ।
प्रधानमन्त्रीको औपचारिक विदेश भ्रमणको निम्ति नेपाली सेना र नागरिक उड्डयन प्राधिकरणले हिजो अपरान्हसम्म सबै तयारी पूरा गरेको बताइन्छ । उसले सलामीदेखि विमानस्थलसम्मका सबै तयारी पूरा गरेपछि हिजो साँझ एकाएक कुनै पनि तयारी नगर्न आदेश आउँदा पररास्ट्र मन्त्रालयअन्तर्गत शिष्टाचार महापालको उच्च तहसमेत अचम्भित भएको थियो ।
स्रोत भन्छ, ‘अब कोही पनि सेना, प्रहरी,सरकारी अधिकारी तथा मन्त्रीहरु चिरिच्याट्ट परेर सवारी साधन हुईंकाउँदै विमानस्थल जानु नपर्ने भएको छ ।’ यसरी प्रधानमन्त्री देउवाले पाँचौ पटक प्रधानमन्त्री भएपछिको पहिलो विदेश भ्रमणबाट बल्ल एउटा नयाँ थालनी गर्न लाग्नुभएको छ ।
प्रधानमन्त्रीको बेलायत र स्टकल्याण्ड भ्रमण तालिका यस्तो छ :
स्कटल्याण्ड पुग्नुअघि उहाँ शनिबार बेलायतको राजधानी लण्डनमा आयोजना हुने बेलायती सांसदहरुको एक समूह र युके–नेपाल ट्रेड एण्ड इन्भेष्टमेण्ट फोरमको कार्यक्रममा सहभागी हुनुहुने छ । त्यसैगरी आइतबार गैरआवासीय नेपाली संघ,भूपू गौर्खा सैनिकहरुको संस्थाका प्रतिनिधिलगायतसँग भेटवार्ता गर्ने कार्यक्रमसमेत रहेको छ ।
सोमबार उहाँले जलवायु परिवर्तनसम्बन्धी सम्मेलन कोप–२६ को उद्घाटन समारोहमा सहभागी भएर त्यही दिन वर्ल्ड लिडर्स समिटलाई सम्बोधन गर्नुहुने कार्यक्रम छ ।
त्यसपछि प्रधानमन्त्री देउवा बेलायती प्रधानमन्त्री बोरिस जोन्सनले आयोजना गर्ने रात्रीभोजमा सहभागी हुनुहुनेछ । सो क्रममा विभिन्न मुलुकका राष्ट्र तथा सरकार प्रमुखहरुसँग द्विपक्षीय भेटघाट गर्ने कार्यक्रम छ ।
स्कटल्याण्ड र बेलायतको कार्यक्रम सकेर १८ गते स्वेदश फर्कनुहुनेछ ।
टिप्पणीहरू