बझाङको पहिरोमा बेपत्ता १९ जनालाई मृतक घोषणा गरिने

कात्तिक पहिलो साता परेको बेमौसमी अविरला वर्षाका कारण गएको पहिरोले बझाङको थलारा गाउँपालिका सबैभन्दा धेरै प्रभावित बन्यो । पहिरो जाँदा उक्त स्थानका २३ जना बेपत्ता भए ।

बेपत्तामध्ये ४ जनाको शवको केही अंश फेला पर्यो तर, बाँकी १९ जनाको भने अहिलेसम्म अत्तोपत्तो लाग्न सकेन । दश दिनअघि गएको पहिरोमा बेपत्ता भएकाहरुलाई तीन वटै सुरक्षा निकायले खोजी गरे पनि पत्तो नलागेपछि खोजी कार्यमा खटिएको टोली फर्किएको छ ।

पहिरोमा परी बेपत्ता भएकाहरुको भेटिने सम्भावना न्यून हुँदै गएपछि खोजीकार्यमा खटिएको प्रहरी टोलीलाई फिर्ता बोलाइएको बझाङका प्रमुख जिल्ला अधिकारी मोहन अधिकारीले बताउनुभएको छ । आज जनआस्थासँग कुराकानी गर्दै अधिकारीले पहिरो पिडितका परिवारसँग कुराकानी गरेपछि मात्र प्रहरीलाई फिर्ता बोलाइएको बताउनुभयो ।

प्रजिअ अधिकारीका अनुसार पहिरोमा परेर बेपत्ता भएका नागरिकहरुलाई मृतक सरहको राहत दिइने छ । गृहमन्त्रालयको निर्देशनअनुसार बेपत्ता सबैको पहिले मृत्यु दर्ता गरिने र त्यसपछि मात्र राहत रकम उपलब्ध गराइने छ । कात्तिक पहिलो साता थलारा–४ डिक्लामा पहिरोमा परी दुई परिवारका २३ जना बेपत्ता भएका थिए ।