एमालेले लेखा समिति मागेपछि भरत शाहले भने,’राजीनामा दिएको मलाई थाहा छैन’
प्रमुख प्रतिपक्ष दल नेकपा एमालेले सार्वजनिक लेखा समितिको सभापतिमा दावी गरेको छ ।
तत्कालीन प्रमुख प्रतिपक्षी दलको हैसियतमै कांग्रेसले समितिको सभापति पाएको थियो,भरतकुमार शाह सभापति छन् । तर,अहिले कांग्रेसले गठबन्धन सरकारको नेतृत्व गरिरहेको छ भने एमाले प्रमुख प्रतिपक्षीको भूमिकामा छ ।
आज सार्वजनिक लेखा समितिको बैठकमा बोल्दै नेकपा एमालेका सांसदद्वय गोकुल बाँस्कोटा र राजेन्द्र गौतमले विश्वभरको संसदीय परम्परा र नेपालको आफ्नै अभ्यासअनुसार समितिको सभापति प्रमुख प्रतिपक्षले पाउनुपर्ने दाबी गरे । पूर्वसञ्चारमन्त्री समेत रहेका बाँस्कोटाले ‘लोकतन्त्रको सुन्दर पक्षको कदर गरियोस्’ भन्दै समितिका सभापति भरत शाहको राजीनामा मागेका हुन् ।
अर्का सांसद गौतमले पनि संसदीय विधि,अभ्यास र परम्परालाई प्रभावकारी बनाउने हो भने सार्वजनिक लेखा समितिको सभापति प्रमुख प्रतिपक्ष दलले पाउनुपर्ने दाबी गरेका छन् । सरकारलाई चेक एण्ड ब्यालेन्स गर्ने ठाउँ समिति भएको भन्दै उनले भने, ‘यसको अगुवाई र नेतृत्व प्रमुख प्रतिपक्षले गर्नुपर्छ ।’
लेखा समितिका सभापति शाहले भने यसबारे आफूले धेरै बोल्न नचाहेको प्रतिक्रिया दिएका छन् । विगतमा लेखा समितिको सभापतिले राजीनामा दिएको आफूलाई थाहा नभएको भन्दै उनले थपे, ‘यो विषयको उठान गर्नु विपक्षको धर्म हो । यसले प्रजातन्त्र सुदृढ हुन्छ । उहाँहरुलाई धन्यवाद दिन चाहन्छु ।’
टिप्पणीहरू