ट्रकसहित सालको काठचोर समातियो
उदयपुरमा अवैध रुपमा सालको काठ ओसारपसारमा पक्राउ परेका दुई जनालाई जिल्ला वन कार्यालय उदयपुर ‘क’ को हिरासतमा राखेर प्रहरीले प्रारम्भिक अनुसन्धान शुरु गरेको छ ।
पक्राउ परेकामा उदयपुर बेलका नगरपालिका ५ का २९ वर्षीय रुपन विष्ट ट्रक चालक हुन् भने चौदण्डीगढी नगरपालिका ३ का ३२ वर्षीय दिनेश राई स्थानीय बासिन्दा हुन् ।
त्रिपालले छोपेर चौदण्डीगढी–१, कटहरबोटेबाट चौदण्डीगढी–३, आमसालतर्फ चिरान सालको काठ ल्याउँदै गरेको को.१ ख २६०३ नम्बरको मिनिट्रकलाई प्रहरीले हिरासतमा लिएको हो ।
ट्रकबाट बरामद गरिएको ५१ दशमलव १५ क्यूबिक फिटका ७१ थान चिरान काठलाई प्रहरीले जिल्ला वन कार्यालयमा बुझाएको छ ।
हाल उक्त काठको सरकारी मूल्य झण्डै एक लाख रुपैयाँ बराबर रहेको हुन्छ भने बजार मूल्य अनुमानित दुई लाखभन्दा बढी रहेको बताइएको छ । पक्राउ परेका दुबै जनाविरुद्ध वन ऐन २०७६, अन्तर्गत कानुनी कारबाही गरिने निमित्त वन अधिकृत जागेश्वर साहले बताउनुभएको छ ।
टिप्पणीहरू