आज जताततै एमसीसी बिरोधमा कार्यक्रम, दिउँसो पटक पटक संसद घेरिने
अमेरिकी सहयोग परियोजना एमसीसीको चर्को बिरोध गर्ने क्रममा आज राजधानीमा जताततै प्रदर्शन हुने भएको छ । हिजो दिउँसो प्रहरीले प्रदर्शनकारीहरुमाथि धरपकड गरेकाले आजको प्रदर्शन थप तनावग्रस्त हुने आँकलन गरिएको छ ।
सरकारले आजैदेखि संसदको अधिवेशन डाकेको छ । अमेरिकी सहस्राब्दी च्यालेञ्च कर्पोरेसनकी उपाध्यक्ष फतिमा सुमारको टोली पनि सम्झौता पारित गराउने रणनीतिमा हिजोेदेखि काठमाडौंमा सक्रिय भएको एमसीसी बिरोधी राजनीतिक दल तथा समूहले बताएका छन् ।
त्यहि क्रममा आज दिउँसो १ बजे माइतीघर मण्डलामा नेपालका लागि नेपाली, नेकपा (माले), नेकपा क्रान्तिकारी, नेकपा (विप्लव) लगायतका राजनीतिक दल र एमसीसी खारेज अभियानले एमसीसीबिरुद्ध बिरोध प्रदर्शन कार्यक्रम राखेका छन् ।
राजनीतिक विश्लेषक हेमन्त सेढाइं लगायतको समूहले एमसीसीविरुद्ध बिरोध प्रदर्शनसहित आजै दिउँसो २ बजे संसद भवन घेराउ गर्ने जनाएको छ । त्यसअघि माइतीघरमा जम्मा भएर टोली नयाँ बानेश्वर जाने जनाइएको छ ।
त्यसैगरी समूह १०० का बब्लु गुप्ता, अभियन्ता हेमराज थापा, मुना श्रेष्ठलगायत एमसीसी खारेज अभियानले सोबिरुद्ध दिउँसो २ बजे माइतीघर मण्डलामा बिरोध प्रदर्शन गर्ने जनाएका छन् ।
उता भक्तपुरमा पनि.नेमकिपा निकट नेपाल क्रान्तिकारी युवा संघ र क्रान्तिकारी विद्यार्थी संघले एमसीसी सम्झौता खारेजीको माग गर्दै दिउँसा ३ बजे प्रदर्शन गर्ने भएको छ । प्रदर्शनका लागि कमलविनायकमा भेला हुने, सूर्यविनायकसम्म जुलुस निकालिने र अन्तमा सभा गरिने बताइएको छ ।
हाम्रो नेपाल हामी नेपाली अभियान, शाही युवा शक्ति नेपाल र राष्ट्रिय शक्ति नेपाल (एमसीसी विरुद्ध संयुक्त महाअभियान) ले पनि एमसीसीको बिरोधमा संसद भवन घेराउ गर्ने बताएको छ । उसले दिउँसो ४ बजे नयाँ बानेश्वरमा पुगेर संसद घेराउ गर्ने जानकारी दिएको छ ।
त्यसैग्री परिवर्तनका लागि हाम्रो आवाजले एमसीसीबिरुद्ध भक्तपुर दरबारस्क्वायरमा दिउँसो ४ बजे प्रदर्शन र सभा गर्ने जानकारी दिएको छ ।
एमसीसीको बिरोध गर्ने क्रममा नेपाल कम्युनिष्ट पार्टी (विप्लव) ले मुलुकभरका जिल्ला, स्थानीय तह र सहरहरूमा कोणसभा गर्ने बताएको छ । तर, स्थान र समय भने खुलाइएको छैन ।
टिप्पणीहरू