नयाँ पार्टीको बैठक जारी,भोलि सनाखतको तयारी

निर्वाचन आयोगमा दल दर्ताको क्रममा रहेको नेकपा (एकीकृत समाजवादी) पार्टीको दोस्रो दिनको बैठक आज बिहानैदेखि चन्द्रागिरी हिल्समा शुरु भएको छ । बैठकमा पार्टीको अन्तरिम विधान, घोषणापत्र र नियमावलीमाथि केन्द्रीय सदस्यहरुले छलफल गरेको बताइएको छ ।

प्रस्तावित पार्टीका अध्यक्ष माधवकुमार नेपाललाई नयाँ पार्टी दर्ताका लागि २० प्रतिशत केन्द्रीय सदस्य पुर्याउनु पर्ने हुन्छ । बैठकमा सहभागी एक नेताका अनुसार झण्डै पाँच दर्जन केन्द्रीय सदस्य र ३२ जना संघीय सांसदको सहभागिता रहेको छ ।भोलि निर्वाचन आयोगमा सनाखत गर्न जाने केन्द्रीय सदस्यहरु हिजो दिउँसोदेखि चन्द्रागिरी रिसोर्ट पुगेका हुन् । आजको बैठकले विधान, घोषणापत्र र नियमावली पारित गरेपछि भोलि त्यहाँबाट सनाखतका लागि सोझै आयोग जाने तयारी छ ।