भारतीय एसएसबीले तुइन फुस्कायो,गृह मन्त्रालय यथार्थ खोज्दै
गृह मन्त्रालयले तुइनको लठ्ठा फुस्काएपछि महाकाली नदीमा एक जना नेपाली नागरिक बेपत्ता भएको विषयमा यथार्थ खोज्ने बताएको छ । हिजो दार्चुला जिल्लाको व्यास गाउँपालिका २ मा तुइनबाट नेपालतर्फ आउँदै गरेका जयसिंह धामी भारतीय एसएसबीले लठ्ठा काटिदिँदा महाकालीमा खसेर बेपत्ता भएका छन् ।
उक्त घटनाप्रति दुःख व्यक्त गर्दै गृह मन्त्रालयले सञ्चार माध्यम र सामाजिक सञ्जालमा प्रकाशित समाचार र सूचनाप्रति गम्भीर ध्यानाकर्षण भएको र घटनाको यथार्थ पत्ता लगाउन स्थानीय प्रशासन एवम् सुरक्षा निकायहरुलाई परिचालन गरिएको जनाएको हो ।
मन्त्रालयले सत्य तथ्य पत्ता लगाउन र हराएका व्यक्तिको खोजी तथा उध्दार गर्न जिल्ला प्रशासन कार्यालय दार्चुला, त्यहाँस्थित नेपाल प्रहरी,सशस्त्र प्रहरी बल नेपाल र राष्ट्रिय अनुसन्धान विभागको टोली खटिएको बताएको छ ।
आज प्रकाशित विज्ञप्तिमा टोलीले सत्य तथ्य पुष्टि नगरेको अवस्थामा भ्रम सिर्जना हुनेगरी सूचना तथा समाचार प्रकाशित नगर्न गृह मन्त्रालयले अनुरोध गरेको हो ।
टिप्पणीहरू