‘ओलीले धोका दिए,अब माधव नेपाललाई साथ दिन्छौँ’

पार्टी निर्णय विपरित प्रधानमन्त्री शेरबहादुर देउवालाई विश्वासको मत दिएका केपी ओली पक्षका सांसदहरु माधव नेपाल समूहमा लाग्ने भएका छन् । अध्यक्ष केपी ओलीले पटक-पटक संसद विघटन गरेर संविधान र लोकतन्त्र विरोधी कदम चालेकाले ओली समूह छोडेको उनीहरुको भनाइ छ ।

प्रतिनिधिसभाको हिजोको वैठकमा अप्रत्यासित रुपमा ओली पक्षका ८ जना सांसद विश्वासको मतको प्रस्तावको पक्षमा उभिएका थिए । ओली क्याबिनेटमा मन्त्री भएकादेखि नेपाल खेमा छोडेर संस्थापनतिर लागेकासम्मले देउवालाई विश्वासको मत दिए । ओलीको कट्टर समर्थक भनेर चिनिएकाहरु लाइन लागेर देउवाको पक्षमा उभिएपछि धेरैले अचम्म पनि माने ।

लामो समय नेपाल समूहमै रहेर केही समयअघि ओलीतिर लागेकी सुदूरपश्चिमकी सांसद बिनादेवी बुढाथोकीले विश्वासको मत दिने आफूहरुको निर्णय स्वभाविक भएकाले अचम्म मान्न नपर्ने बताइन् । केपी ओलीले पटक-पटक विघटन गर्न खोजेको संसद फेरि विघटनमा जान दिनु हुँदैन भन्ने सचेतताले विश्वासको मतको पक्षमा उभिएको उनले तर्क गरिन् ।

‘दुई पटकसम्म संसद विघटन गरेर ओलीले संविधान र लोकतन्त्रलाई धोका दिने काम गर्नुभयो । पार्टीगत रुपमा हामी फरक ठाउँमा उभिएको भए पनि संविधान र लोकतन्त्रको प्रश्नमा सबै एकै ठाउँमा उभिनुपर्छ भन्ने लागेर त्यो निर्णय गरेका हौँ’,उनले भनिन् ।

अघिल्लो पटक आफूले संसद बचोस् भनेरै केपी ओलीलाई विश्वासको मत दिएको उनले बताइन् । प्रतिनिधिसभालाई विघटनमा जानबाट रोक्न सक्ने धेरै विकल्प हुँदाहुँदै पनि ओलीले विघटनको बाटो रोजेको उनको आरोप छ ।

भनिन्, ‘यसअघि म माधव नेपाल समूहमा भए पनि संसद जोगिन्छ भने पार्टीको नेतालाई मत दिऊँ भनेर विश्वासको मत दिएको हो । तर उहाँले हाम्रो भोटको सम्मान गर्नुभएन । बरु जबर्जस्ती संसद विघटन गर्नुभयो । त्यसकारण हामी देउवालाई विश्वासको मत दिएर भने पनि संसद जोगाउनुपर्छ भन्ने ठाउँमा पुग्यौँ ।’

सांसद बुढाथोकीले संविधान र लोकतन्त्रको पक्षमा उभिँदा पार्टीले कारवाही गरेपनि आफूलाई फरक नपर्ने टिप्पणी पनि गरिन् । ओली पक्षले कारवाही गरे आफूहरु नेपाल समूहमा जाने उनको भनाइ छ । यद्यपि देउवालाई विश्वासको मत दिने ओली समूहका आठ जना सांसदबीच अहिलेसम्म सामूहिक छलफल भने नभएको उनले बताइन् ।

‘कारवाहीको डर छैन । परिस्थिति अनुसार अघि बढ्छौँ । वरिष्ठ नेता स्वयंले विश्वासको मत दिनुभएको छ । हामी उहाँसँगै रहेर आफ्नो राजनीति अघि बढाउन पनि सक्छौं’,सांसद बुढाथोकीले भनिन् ।

फ्लोर क्रस गर्ने ओली समूहका अर्का एक सांसदले पनि वरिष्ठ नेता नेपाललाई साथ दिने बताएका छन् । नेता नेपालको भूमिकाकै कारण संविधान र लोकतन्त्र ट्रयाकमा आएको उनले दाबीसमेत गरे ।

‘संविधान,लोकतन्त्र,विधिको शासन र सिंगो एमाले पार्टीको हितका लागि माधव कमरेडलाई साथ दिनुपर्ने अवस्था बनेको छ । उहाँकै भूमिकाले संसद र संविधानको रक्षा भएको हो । त्यसैले अब हामी उहाँसँगै हुन्छौँ’, ती सांसद किसान श्रेष्ठले भने ।

ओली समूहका नेताहरु सर्वोच्च अदालतको फैसलाको समेत विरुध्दमा उत्रन थालेपछि आफूहरु उक्त समूह छोड्ने निष्कर्षमा पुगेको उनले सुनाए ।