मतदान छाडेर वामदेव पत्नी टोक्यो ओलम्पिकमा,विश्वासको मत छापामार शैलीमा

हिजो प्रधानमन्त्री शेरबहादुर देउवालाई विश्वासको मत दिने प्रस्तावमा काँग्रेसको ६१ बाहेक अरु दलका १ सय ४ मत परेको छ । उता,१ सय २१ सिट भएको एमालेको आफ्नो पक्षमा अर्थात् देउवाको विपक्षमा ८३ भोट खसेको छ । यो हिसाबले हेर्दा एमालेको ३८ भोट आफ्नो पक्षमा देखिएन ।

त्यसमध्ये पनि २३ जना माननीयले पार्टीको ह्वीप लत्याउँदै प्रधानमन्त्री शेरबहादुर देउवालाई विश्वासको मत दिएका छन् भने अविश्वासमा भोट हाल्ने निर्देशन पालना नगरी वीचैमा १० जना उठेर हिंडेका छन् । हाल नयाँ दिल्लीमा उपचाररत वरिष्ठ नेता झलनाथ खनालले पनि विश्वासको मतको पक्षमा मतदान गर्न अनुरोध गर्नुभएकाले उहाँले समेत देउवालाई मतदान गरेसरह छ । त्यसैगरी उपाध्यक्ष भीम रावलले अध्यक्ष ओलीको ह्वीप मान्नुभएको देखिएन बरु पदबाटै राजीनामा दिनुभयो । त्यो हिसाबले ओलीको निर्देशन ३५ जनाले अवज्ञा गर्नुभयो ।

“एमालेका तर्फबाट प्रवक्ता प्रदीप ज्ञवालीले धारणा राख्नुभयो । यो काममा पनि अध्यक्ष ओलीले सुवास नेम्वाङ्ग,इश्वर पोख्रेल,बिष्णु पौडेल कसैलाई पत्याउनु भएन ।”

यता,विगतमा नेपालनिकट भनेर चिनिएका तीन दर्जनभन्दा बढी सांसदमध्ये पाँच जनाले ओलीको पक्षमा अर्थात् देउवाको विपक्षमा मतदान गर्नुभयो । उहाँहरूमा शेरबहादुर तामाङ,लालबाबु पण्डित,कृष्णभक्त पोखरेल,गणेश ठगुन्ना, गणेश पहाडी हुनुहुन्छ ।

हिजोको मतदानमा उपाध्यक्ष वामदेव गौतमकी श्रीमती तुलसा गौतम भने अनुपस्थित हुनुुहुन्थ्यो । जापानको राजधानी टोकियोमा आयोजना हुन लागेको ओलम्पिक खेलकूदमा नेपाली अफिसियलको रुपमा भाग लिँदै उहाँ अस्ति त्यसतर्फ प्रस्थान गर्नुभएको हो ।

“विगतमा नेपालनिकट भनेर चिनिएका तीन दर्जनभन्दा बढी सांसदमध्ये पाँच जनाले ओलीको पक्षमा अर्थात् देउवाको विपक्षमा मतदान गर्नुभयो । उहाँहरूमा शेरबहादुर तामाङ,लालबाबु पण्डित,कृष्णभक्त पोखरेल,गणेश ठगुन्ना, गणेश पहाडी हुनुहुन्छ ।”

विश्वासको मत लिने निर्णय प्रधानमन्त्रीले आइतबार बिहान एक्कासी गर्नुभएको थियो । त्यसैकारण कसैले पनि पूर्वयोजनाका कार्यक्रम रध्द गर्न नसकेको देखियो । गौतम पत्नी पनि प्रधानमन्त्रीले तीस दिनभित्र विश्वासको मत लिने भएकाले टोकियोबाट फर्केपछि विपक्षमा मतदान गर्न मिल्ने भन्दै उता जानुभएको हो ।

देउवाले काँग्रेसका कसैसँग सल्लाह नगरी आइतबार बिहान माधवकुमार नेपाल र प्रचण्डसँग सुटुक्क सल्लाह गरेर विश्वासको मत लिने निर्णय गर्नुभएको काँग्रेसीहरूले समेत पछि मात्र थाहा पाएका थिए । त्यसको गतिलो प्रमाण पार्टी काममा पोखरा गएका सांसद गगन थापा सडक मार्ग हुँदै काठमाडौं आइरहँदा पहिरोले दमौली नजिकै रोकिएपछि हेलिकोप्टरमा काठमाडौं आएकोले समेत पुष्टि हुन्छ ।

“ओलीको निर्देशन ३५ जनाले अवज्ञा गर्नुभयो ।”

हिजोको संसद बैठकमा निवर्तमान प्रधानमन्त्री केपी शर्मा ओली अबेर मात्र प्रवेश गर्नुभयो । मतदानअघि भएका सम्बोधनमा सत्ता गठबन्धनका नेताले पटकपटकको सँसद विघटननिम्ति चर्को आलोचना गर्ने सुईंको पहिल्यै पाएपछि उहाँ सम्बोधनको अवधिभर घर र बाहिरै बस्नुभएको थियो । एमालेका तर्फबाट प्रवक्ता प्रदीप ज्ञवालीले धारणा राख्नुभयो । यो काममा पनि अध्यक्ष ओलीले सुवास नेम्वाङ्ग,इश्वर पोख्रेल,बिष्णु पौडेल कसैलाई पत्याउनु भएन ।

देउवा सरकारले दलीय ह्वीप उल्लंघन गरेका सांसदसहितको मत प्राप्त गरेपछि अब संविधानको धारा ७६ (५) बमोजिम गठित सरकारका आगामी नीति तथा कार्यक्रम,बजेट र विधेयकहरू पारित गराउने क्रममा समेत ह्वीप नलाग्ने अवस्था सिर्जना भएको सांसदहरूले नै बताएका छन् । विश्वासको मत दिएर सरकार र प्रतिनिधिसभालाई जोगाउने तर लगत्तै अन्य विषयमा निर्णयार्थ प्रस्तुत हुँदा उनै सांसदले विपक्षमा मतदान गर्ने भन्ने अदालतको फैसलाको भावनासमेत नरहेको उनीहरूको तर्क छ ।