डेल्टा भेरियण्टपछि डेल्टा प्लसको डर,कोरोनाको तेस्रो लहर आउने खतरा
कोरोनाको दोस्रो लहरका लागि जिम्मेवार मानिएको डेल्टा भेरियण्टको उत्परिवर्तन डेल्टा प्लसले तेस्रो लहर ल्याउने आशंका गर्न थालिएको छ । भारतपछि डेल्टा प्लसको असर अहिले बंगलादेशमा देखिन थालेको छ । दोस्रो लहरझैँ सर्वत्र मानवीय क्षति पुर्याउनसक्ने आशंका गर्दै बंगलादेशले एक साता लामो निकै कडा निषेधाज्ञा जारी गरेको छ ।
डेल्टा प्लसकै कारण कोरोनाको तेस्रो लहर आउने कुनै प्रमाण नभेटिएको जनस्वास्थ्यविद्हरुले बताए पनि बंगलादेशमा भने उच्च सतर्कता अपनाइएको छ ।
डेल्टा प्लस नेपालमा समेत भेटिएको ए वाई १ भेरियण्ट हो । डेल्टा प्लस भनिएको नयाँ भेरियण्टले अहिले विश्वभर लगाइएको कोरोनाविरुद्धको खोपलाई निष्प्रभावी बनाउने चिन्ता बढेको छ । उता भारत सरकारले डेल्टा प्लसलाई ‘चिन्ताको भेरियण्ट’ भनेर जनस्वास्थ्यमा दखल पुर्याउनसक्ने जोखिमयुक्त भाइरसहरुको सूचीमा राखिसकेको छ ।
गत वर्ष पहिलो पटक भेटिएको डेल्टा भेरियण्ट भारतमा घातक दोस्रो लहरका लागि जिम्मेवार ठानिएको छ । कोरोनाको दोस्रो लहरले सबैभन्दा धेरै क्षति पुर्याएको राष्ट्रहरुमा भारत पहिलो नम्बरमा रहेको छ ।
उता,भोलि सोमबारदेखि सात दिनसम्म लकडाउन घोषणा गरेको बंगलादेशमा धेरै जना संक्रमितमा डेल्टा भेरियण्ट पाइएको बताइन्छ ।
नेपालमा पनि स्वास्थ्य तथा जनसंख्या मन्त्रालयले असार ७ गते कोभिड–१९ संक्रमणको क्रममा डेल्टा भेरियण्टको परिवर्तित रुप फेला परेको जनाएको थियो ।
उक्त उत्परिवर्तन रुप नेपालसहित १० वटा देशमा भेटिएको छ । त्यसलाई के ४१७एन नाम दिइएको बताउँदै मन्त्रालयले परिवर्तन भएर बनेको भाइरसको नयाँ स्वरूपलाई एवाई १ नाम दिएको छ ।
भाइरसहरू उत्परिवर्तन हुने कारण हालसम्म पत्ता लाग्न सकेको छैन । तीन प्रतिशतभन्दा कम नागरिकले मात्र पूर्ण मात्रामा खोप लगाएको अवस्थाका कारण नेपाल ‘कोरोना भाइरसहरु उत्परिवर्तन हुन सक्ने उर्वरभूमि’ भएको विज्ञहरूले बताएका छन् ।
टिप्पणीहरू