एअरपोर्टबाट १३ थान ल्यापटप चोर्ने पक्राउ
नेपाल पारवहन तथा गोदाम व्यवस्था कम्पनी लिमिटेडबाट १३ थान ल्यापटप चोरी गरेको अभियोगमा एक जना युवक पक्राउ परेका छन् । त्रिभुवन अन्तर्राष्ट्रिय विमानस्थल कार्यालयले सञ्चालनमा ल्याएको कार्गो कम्प्लेक्समा रहेको आयात गोदामबाट ती ल्यापटप हराएका थिए ।
पहिलो पटक ७ थान र दोस्रो पटक ६ थान चोरी गर्ने विष्णु अधिकारीलाई हिजो महानगरीय अपराध महाशाखाले नियन्त्रणमा लिएपछि ल्यापटप चोरीका भित्रि रहस्य बाहिरिएका हुन् ।
अधिकारीले गत जेठ ७ गते र ११ गते आयात भएका ५ सय ७ पिस ल्यापटपमध्ये १३ थान ल्यापटप चोरी गरेको भन्ने निवेदनका आधारमा उनलाई पक्राउ गरिएको प्रहरीको अपराध महाशाखाले जनाएको छ । उनले जेठ २० गते राती ७ थान र असार ३ गते ६ थान ल्यापटप चोरी गरेको देखिएको छ ।
महानगरीय प्रहरीको विमानस्थल सुरक्षा कार्यालयसँगको समन्वयमा अनुसन्धान गरेपछि अधिकारी चोरीमा संलग्न रहेको खुलेको हो । पक्राउ परेका २९ वर्षका अधिकारी सिन्धुपाल्चोकको पाँचपोखरी थाङपाल गा.पा. २ घर भई हाल गोकर्णेश्वर नगरपालिका ८ बेशीगाउँमा बस्थे ।
उनको साथबाट डेल कम्पनीको ल्यापटप ८ थान, त्यसको चार्जर २ थान समेत बरामद गरिएको छ ।
टिप्पणीहरू