नारायणी नदी उच्च विन्दुमा, मेलम्चीमा आज साँझ पनि ठूलो वर्षा हुने (भिडियो सहित)

नारायणी नदीको सतह हालसम्मकै उच्च विन्दुमा पुगेको छ । जल तथा मौसम पूर्वानुमान महाशाखाका बाढीविज्ञ विक्रम श्रेष्ठका अनुसार नदीको सतह गए राति १० बजेर ५० मिनेटमा १० दशमलव ४६ मिटर पुगेको थियो । उक्त समयमा पानीको बहाव एक करोड ६४ लाख ५५ हजार लिटर प्रतिसेकेन्ड रहेको बताइन्छ ।

जनआस्थासँग कुरा गर्दै श्रेष्ठले बुधबार बिहानदेखि नारायणीमा पानीको वहाव घट्दो क्रममा रहे पनि पानीको सतह अझै पनि उच्च रहेको बताउनुभयो । उहाँका अनुसार कालिगण्डकी र देवघाटमा समेत पानीको वहाव उच्च देखिएको छ ।

उता कोशीमा पनि हिजो देखिएको उच्च बहावमा आज सामान्य कमी आएको छ । सिन्धुपाल्चोकको मेलम्चीमा भने पहिरो र बाढी मिसिँदा ठूलो क्षति भएको श्रेष्ठले बताउनुभयो । आज बिहान मेलम्ची नदीको सतह एकैपटक २ दशमलव ५६ मिटरको विन्दुबाट बढेर २ दशमलव ८५ मा पुगेपछि बाढिले ठूलो विनाश गरेको हो ।

त्यसैगरी अर्का मौसम विज्ञ मिनकुमार अर्यालले सिन्धुपाल्चोकमा आज बेलुकीपख पनि उच्च वर्षाको सम्भावना रहेको बताउनुभएको छ । उहाँका अनुसार अहिले कैलाली, टिकापुरलगायतका पश्चिमी भेगमा पनि ठूलो वर्षा भइरहेको छ ।

आज लुम्बिनी, गण्डकी र वाग्मती प्रदेशका केही स्थानमा ठूलो वर्षा हुनसक्ने अर्यालले बताउनुभयो । आज दिउँसो सामान्य देखिए पनि भोलिबाट मनसुन थप सक्रिय हुने महाशाखाले जनाएको छ ।

https://youtu.be/RzQE5fuRoPc