बजेटमा पनि घुस्यो एमसीसी

सरकारले शनिवार सार्वजनिक गरेको आगामी आर्थिक वर्षको बजेटमा पनि विगतमाझैँ विवादास्पद अमेरिकी सहयोग कार्यक्रम मिलिनियम च्यालेन्ज कर्पोरेशन (एमसीसी) बाट पैसा आउने किटानी गरिएको छ ।

लामो समयदेखि सो विषयमा चर्को बहस र विवाद हुँदै आएको छ । तर,गत वर्ष अर्थमन्त्री युवराज खतिवडाले सार्वजनिक गरेको बजेटमा झैँ यो वर्ष पनि प्राप्त हुने वैदेशिक अनुदान शीर्षकअन्तर्गत मिलिनियम च्यालेन्ज कर्पोरेशन (एमसीसी) अमेरिकाको कूल सहयोग रकममध्ये ८ अर्ब ९ करोड २२ लाख रुपैयाँ उल्लेख छ ।तत्कालीन नेकपा र एमालेभित्र यही एमसीसी विवादले ठूलो रुप लिएको थियो । अरु विवाद बढ्दै गएको सन्दर्भमा गत वर्ष एमसीसी नेकपाभित्र सबैभन्दा पेचिलो बनेको थियो । खतिवडाले बजेटमा उक्त रकम प्राप्त हुने अनुदानमा उल्लेख गरेपछि आगोमा घिउ थपेको थियो ।

अहिले उनै खतिवडा एमसीसीको मुख्यालय रहेको वासिङगटन डिसीमा पुगेका छन् । उनले राजदूतको सीमा नाघेर गत सोमबार एमसीसीबारे सरकारी सञ्चारमाध्यमलाई अन्तर्वार्तासमेत दिएका छन् ।