भारतमा कोरोनाले राख्यो दुःखद कीर्तिमान, नयाँ दिल्ली घाट व्यवस्थापकको गला अवरुद्ध

भारतमा पछिल्लो २४ घण्टाभित्र यसअघिका रेकर्ड तोडिने गरी मृत्यु हुनेको संख्या बढेको छ । कोभिड–१९ महामारीको दोस्रो लहरमा लपेटिएको भारत यस पटक जोगिन निकै गाह्रो हुँदै गएको समाचार प्राप्त भएका छन् ।

त्यहाँको केन्द्रीय स्वास्थ्य मन्त्रालयले एकैदिन १ हजार ७ हजार ६१ जना संक्रमितको मृत्यु भएको जनाएको छ । त्यसैगरी पछिल्लो २४ घण्टामा २ लाख ५९ हजार १ सय ७० संक्रमित पत्ता लागेको तथ्याङ्क सार्वजनिक गरेसँगै भारतमा अहिलेसम्म १ करोड ५३ लाख २१ हजार ८९ जनालाई कोरोना संक्रमण पुष्टि भएको छ ।

झण्डै एक वर्षको बीचमा १ लाख ८० हजार ५ सय ३० जना संक्रमितको ज्यान गएको छ । १ अर्ब ३० करोड हाराहारीको जनसंख्या रहेको भारतमा अहिले २० लाख ३१ हजार ९ सय ७७ जना सक्रिय संक्रमित छन् । अहिलेसम्म भारतमा १२ करोड ७१ लाख २९ हजार १ सय १३ जनालाई मात्रै कोरोनाविरुद्धको खोप दिइएको छ ।

यता, दिनहुँ मृतक संख्या बढेपछि एउटा दाहसंस्कारस्थलका घाट व्यवस्थापकले हृदयविदारक दृश्य उल्लेख गर्दै गला अवरुद्ध बनाएका छन् । उनले भनेका छन् ‘पहिलेको महामारीमा यो घाटमा सबैभन्दा धेरै लाश सद्गत गरिएको संख्या भनेकै ९ सय ६६ थियो । तर अहिले दिनहुँ बढि रहेको छ । सबैभन्दा दुःखद् भनेको निधन भएका किशोर, किशोरी र बालबालिकाको संख्या ह्वात्तै बढेको छ । ती युवा उमेरमा प्रवेश गर्न लागेका किशोर किशोरीको मृत शरिर देखेपछि हामी सबैलाई गाह्रो हुने गरेको छ ।’

उनले भने ‘हिजो जलाउन ल्याइएकी एउटी महिला २६ वर्षकी थिइन् । साथमा उनको सानो मृतक छोरा समेत थियो । मैले अहिलेसम्म दिल्ली जस्तो शहरमा यस्तो महामारी र मान्छेको मृत्यु देखेको थिइनँ ।’

https://www.facebook.com/100055615313003/videos/250605343469974/