यही चैत २५ गते सम्पन्न नेपाल पत्रकार महासंघको चुनाव नुवाकोटको हकमा दोहोरिनुपर्ने मागसहित केन्द्रीय निर्वाचन समितिमा उजुरी परेको छ । जिल्लामा क्रमसंख्या उल्लेख भएका मत्रपत्रमा मतदान गरेको पाइएको र त्यस्तो मतगणना भएपछि खारेजीको माग गर्दै उजुरी परेको हो । जिल्ला निर्वाचन समितिले समस्या समाधान गर्न नसकेपछि उजुरीसहित मतपेटिका र प्रमाणहरु महासंघको केन्द्रीय कार्यालयमा झिकाइएको छ ।

जिल्ला अध्यक्षमा उम्मेदवारी दिएका नारायणप्रसाद नेपाल, उपाध्यक्षमा उम्मेदवारी दिएकी रुपा अर्याललगायतका उम्मेदवारहरुले बदर मतसमेत गणना गरिएको,संकेत नं सहितका मतपत्र भेटिएको भन्दै निर्वाचनमा धाँधली भएको आरोप लगाएका छन् ।

पत्रकारको निर्वाचन रद्द गर्न माग

जिल्ला निर्वाचन समितिले अध्यक्षमा कपिलदेव खनालसहितको प्यानल बिजयी भएको घोषणा गरेपनि सोही प्यानलबाट निर्वाचित अन्य सदस्यले भने शपथ बहिस्कार गरेका छन् ।

जिल्लामा प्रेस संगठनको नेतृत्वमा प्रेस युनियन नेपाललगायतको संयुक्त प्यानल कपिलदेव खनालको नेतृत्वमा र जनपत्रकार संगठनको नेतृत्वमा,प्रेस चौतारी लगायतको प्यानल नारायणप्रसाद नेपालको नेतृत्वमा चुनावी मैदानमा उठेका थिए ।

पुनः निर्वाचन हुनुपर्ने मागसहित उजुरी परेपछि अब के गर्ने भन्नेबारे केन्द्रीय निर्वाचन समिति परामर्शमा रहेको बुझिएको छ । प्रहरीले गरेको मुचुल्कामा २५ गते क्रमांक उल्लेखित प्रयोग भएका,नभएका मतपत्र रहेको उल्लेख छ । मुचुल्कामा अध्यक्ष पदका उम्मेदवार नारायणप्रसाद नेपाल, सचिव जगदिश खनाल र निर्वाचन समितिका सदस्य उत्तम घिमिरेको हस्ताक्षर छ । प्रेस युनियन नुवाकोटले पनि निर्वाचन प्रक्रिया रद्ध गर्न माग गर्दै उजुरी दिएको छ ।