एमालेमा पस्नासाथ हत्याको कारण खोज्न थाले किरणले

नेकपा एमालेका युवा नेता रविकिरण हमालले पार्टीको तर्फबाट तत्कालीन संविधानसभा सदस्य उम्मेदवार ऋषिप्रसाद शर्माको हत्याको राजनीतिक कारण र संलग्नतासमेत छानबिन गरेर सत्यतथ्य बाहिर ल्याउन सरकारसँग माग गरेका छन् ।

तत्कालीन संविधानसभा सदस्यका लागि सुर्खेत क्षेत्र नम्बर १ बाट उम्मेदवार रहेका ऋषिको २०६४ चैत्र २६ गते लोदे भन्ने ठाउँमा हत्या भएको थियो । घटनाको डेढ दशक बितिसक्दा पनि वास्तविकता बाहिर आउन सकेको छैन ।

उक्त घटना शर्माका कार्यकर्ता, शुभचिन्तकको मानसपटलमा ताजै देखिन्छ । ‘देखावटी रुपमा उठाइएका कारबाहीका मुद्दा र मागहरु ओझेलमा परे पनि वास्तविक आवाजहरु अझै मत्थर भएका छैनन्,’ उनीहरुले भने ।

केही हप्ताअघि एमाले प्रवेश गरेका रविकिरण हमालले मंसिर ४ गतेको निर्वाचनमा ऋषि हत्याकाण्ड प्रमुख एजेन्डा बन्नुपर्ने माग राखेका छन् । उनले प्रेस वक्तव्य जारी गर्दै भनेका छन् ‘यसपालि हाम्रा प्रिय नेता शहीद कमरेड ऋषिप्रसाद शर्माको हत्या किन गरियो ? योजनाकार को थिए ? र,हत्या पछाडिको राजनैतिक लाभ के थियो ? भन्ने कुरा प्रमुख एजेन्डा बन्नुपर्छ ।’

ऋषि हत्याकाण्डमा नेपाली काँग्रेसका स्थानीय नेताहरुको हात हुनसक्ने आशंका गरिँदै आएको सन्दर्भमा हमालले वक्तव्य जारी गरेका हुन् ।