असार–साउनमा झैँ मुलुकभर बाढी पहिरोको प्रकोप, सचेत रहन आग्रह

दुई दिनदेखिको अविरल वर्षाका कारण मुलुकका विभिन्न नदीमा पानीको सतह उच्च विन्दुमा पुगेको छ । जलसतह बढेका कारण कतिपय स्थानमा पानी मानव बस्तीसम्म पुगेको छ ।

जल तथा मौसम विज्ञान विभागका अनुसार बागमती नदीको जलसतह उच्च तहमा पुगेको छ । खोकना जल मापन केन्द्रले आज साँझसम्म बाग्मतीमा पानीको सतह अझै बढ्ने जनाएको छ ।

त्यस्तै, त्रिशुली, बुढीगण्डकी र मर्स्याङ्दी नदीको जल सतह पनि सतर्कता तह आसपास पुगेको विभागको भनाइ छ । बबई र राप्ती नदीमा पानीको सतह खतराको तहमा पुगेको छ भने नारायणी पनि उच्च जोखिममा पुगेको छ ।

नदीमा जलसतह बढेसँगै विभागले तटीय क्षेत्रका नागरिकलाई उच्च सतर्कता अपनाउन भनेको छ ।

अहिले पनि काठमाडौं उपत्यकाकासहित देशका अधिकांश क्षेत्रमा भारी वर्षा भइरहेको छ । आगामी छ घण्टा गण्डकी र लुम्बिनी प्रदेशका अधिकांश क्षेत्रमा भारी वर्षा हुने विभागको पूर्वानुमान छ ।

वर्षाको कारण अधिकांश राजमार्ग, सहायक मार्गमा पहिरो गएको छ । कतिपय स्थानमा बिहानदेखि अवरुद्ध सडक खुल्न सकेको छैन ।