काँग्रेसले स्थानीय तहमा उठेकालाई टिकट नदिने
नेपाली काँग्रेसले गत स्थानीय तहको निर्वाचनमा उम्मेदवार बनेका कसैलाई पनि आगामी प्रतिनिधि सभा तथा प्रदेश सभा चुनावमा टिकट नदिने निर्णय गरेको छ ।
काँग्रेसको आज बसेको केन्द्रीय कार्यसम्पादन समितिको बैठकले आगामी निर्वाचनको निम्ति प्रत्यक्ष निर्वाचनतर्फका उम्मेदवारको मापदण्ड तय गर्दै उक्त निर्णय गरेको बताइएको छ ।
बैठकपछि जारी विज्ञप्तिमा भनिएको छ, ‘उम्मेदवार चयन गर्दा पार्टीको विभिन्न तहबाट विधानबमोजिम उम्मेदवारको लागि भएको सिफारिस, व्यक्तिगत योग्यता, नैतिकता, कार्यक्षमता, लोकतान्त्रिक आन्दोलनमा पुर्याएको योगदान, सामाजिक भूमिका, पार्टीको विभिन्न तह र क्षेत्रमा गरेको योगदान, लोकप्रियता एवम् आगामी दिनको सम्भावना समेतलाई आधार बनाइनेछ ।’ स्थानीय तहको निर्वाचनमा कुनै पनि पदमा उम्मेदवार भएको व्यक्तिलाई प्रतिनिधि सभा र प्रदेश सभाको प्रत्यक्ष निर्वाचन प्रणालीतर्फको उम्मेदवार नबनाउने काँग्रेसको निर्णयमा उल्लेख छ ।
निर्वाचन आयोगमा बुझाइएको समानुपातिक तर्फको बन्दसूचीमा हिजो केही नाम हेरफेर गरेपछि आज प्रत्यक्षतर्फका उम्मेदवार चयनको निम्ति बैठक डाकिएको बताइएको छ ।
टिप्पणीहरू