रंगेहात समातिएका उपसचिवले घुस लिएको पुष्टि

सेवाग्राहीसँग लिएको घुस रकमसहित पक्राउ परेका संस्कृति, पर्यटन तथा नागरिक उड्डयन मन्त्रालयका नागरिक उड्डयन महाशाखाका उपसचिव प्रमोद नेपालविरुद्ध विशेष अदालतमा भ्रष्टाचार मुद्दा परेको छ । अख्तियार दुरुपयोग अनुसन्धान आयोगले आज उनीविरुद्ध मुद्दा दायर गरेको हो ।

उपसचिव नेपालले प्याराग्लाइडिङ्ग सञ्चालनको लागि लाइनसेन्स उपलब्ध गराइदिने भन्दै सेवाग्राहीबाट छ लाख घुस लिएको अख्तियारको आरोप छ । उनलाई सोही रकम बराबरको जरिवाना मागदाबी गरिएको छ ।

त्यस्तै, उनको गाडीमा फेला परेको १६ लाख रुपैयाँ आफू वहाल रहेको बिबि एयरवेज प्रालिका प्रमुख कार्यकारी अधिकृत हरिभक्त श्रेष्ठसँग सापटी लिएको खुलेको छ । उनलाई फाइदा हुने गरी उक्त रकम सापटी दिई मतियारको भूमिका निर्वाह गरेको आरोप लगाउँदै अख्तियारले श्रेष्ठविरुद्ध पनि अदालतमा मुद्दा हालेको हो ।

अख्तियारले श्रेष्ठसँग १६ लाख रकम र कैद सजाय मागदाबी गरेको छ ।