खुकुरी ह्वाइट रम निर्यातबाट विदेशी मुद्रा आर्जनमा टेवा पुग्ने दाबी

नेपालको पहिलो मदिरा उत्पादक कम्पनी ‘दि नेपाल डिस्टिलरिज’ ले बहुचर्चित खुकुरी ब्राण्डअन्तर्गत ‘खुकुरी ह्वाइट रम’ बजारमा ल्याएको छ । योसँगै खुकुरी ब्राण्डको पोर्टफोलियोमा अब तीन प्रकारका खुकुरी ट्रिपल एक्स, खुकुरी स्पाइस्ड रम र खुकुरी ह्वाइट रम बजारमा पाइन्छन् ।

खुकुरी ह्वाइट रम एक स्पष्ट पारदर्शी रम भएको बताइएको छ । यसले गर्मीयामका पेयहरूको माग पूरा गर्ने र यसलाई आइसमा हालेर पिउन सकिने जानकारी दिइएको छ । साथै कुनै पनि सफ्ट ड्रिंक्स वा जुसलगायत मिक्सरहरूसँग पनि पिउन सकिने भएकाले ‘खुकुरी ह्वाइट रम’ लाई ककटेल बनाउन व्यापक रुपमा प्रयोग गर्न सकिने कम्पनीले जनाएको छ ।

मोहितो ( : यवष्तय) लोकप्रिय ककटेलमध्ये एक हो, जुन ह्वाइट रम प्रयोगबाट बनाइन्छ । ह्वाइट रमको स्थानीय उत्पादन नभएको र आयातित मदिरामा प्रतिबन्धका कारण नेपालका बारहरूले हिजोआज मोहितो बनाउन ह्वाइट रम प्रयोग गर्नुपर्ने बाध्यता भएको छ ।

नेपालको मौलिक स्वादलाई कायम राखेर कम्पनीले खुकुरीको ह्वाइट रम तयार गर्न २ वर्षभन्दा बढी समय लगाएको जानकारी दिइएको छ । यसलाई विश्वस्तरीय तरल पदार्थको रुपमा विकास गर्नुअघि व्यापक परीक्षण र प्रतिक्रियाको श्रृंखला सञ्चालन गरिएको दाबी गरिएको छ । यो क्रममा नेपालका सबै प्रिमियम बार र रेष्टुरेन्टहरूबाट अपार समर्थन र सहयोग प्राप्त भएको आज प्रकाशित विज्ञप्तिमा जनाइएको छ ।

खुकुरी रमको ब्राण्ड पोर्टफोलियोमा विश्वस्तरीय ह्वाइट रम थपिएकोमा आफूलाई गर्व महशुस भएको ‘दि नेपाल डिस्टीलरिज’का महाप्रबन्धक शुभाष लामिछानेले आफूहरुले रमको आधारभूत पोर्टफोलियोलाई पूर्णता दिएको बताए । ‘हामीले उत्पादन गर्दै आएका रमका अन्य भेराइटी निर्यात गरेजस्तै ह्वाइट रम पनि निर्यात गरी विदेशी मुद्रा आर्जन हुने र यसबाट राष्ट्रिय अर्थतन्त्रलाई थोरै भए पनि टेवा पुग्ने विश्वास लिएका छौं,’ उनले भने ।