मीटरब्याज पीडितमाथि सरकारले दमन गरेको एमालेको आरोप
प्रमुख प्रतिपक्ष दल नेकपा एमालेका सांसद देवेन्द्र दाहालले मीटरब्याजका पीडितलाई राहत दिनुको साटो सरकारले दमन गरेको आरोप लगाएका छन् । राष्ट्रियसभाको आज बसेको बैठकमा बोल्दै उनले मीटरब्याज पीडितलाई सुरक्षाकर्मी लगाएर सरकारले दमन गरेको बताए ।
न्याय माग्न गएका उनीहरुलाई सरकारले उल्टै लाठी चार्ज गरेको भन्दै सांसद दाहालले आपत्तिसमेत जनाएका छन् । पीडित किसानहरुमाथिको दमन रोक्नुपर्ने बताउँदै उनले भने, ‘मीटरब्याजीहरुले आम जनतालाई ठगी गरिरहेको कुरा र व्यापक रुपमा मीटरब्याज असुल गर्दै ठगी भएको कुरा आएको छ । तर ती न्याय माग्न गएकालाई सरकारले उल्टै लाठी चार्ज गर्ने, उनीहरुको आवाज सुन्नुको साटो दमन गर्ने काम भइरहेको छ । यस्तो काम अविलम्ब रोकियोस् ।’
उनले डेंगु रोगको उपचारको निम्ति अतिआवश्यक सिटामोलको अभाव हुन नदिन सरकारको ध्यानाकर्षणसमेत गराएका छन् । सांसद दाहालले बजारमा सिटामोलको अभाव भएको उल्लेख गर्दै तत्काल त्यसको आवश्यक व्यवस्था मिलाउनुपर्ने बताए ।
टिप्पणीहरू