सहकारीको ऋण लिने तर नतिर्नेमा भीईपीका छोराछोरी

लालीगुराँस बहुउद्देश्यीय सहकारी संस्थाले निलम्बित प्रधानन्यायाधीश चोलेन्द्र शमशेर राणाकी छोरी सृष्टि राणा रावललाई २१ दिनभित्र कर्जा तिर्न निर्देशन दिएको छ । सहकारीले तोकिएको मितिभित्र ऋण चुक्ता गर्न सार्वजनिक सूचना जारी गरेको छ ।

पूर्वगभर्नर तिलकबहादुर रावलकी बुहारीसमेत रहेकी सृष्टिले व्यापारिक प्रयोजनको निम्ति सहकारीबाट ऋण लिएकी बताइन्छ । उनले श्रीमान विनय रावललाई जमानत राखेर कर्जा झिकेको सहकारीले बताएको छ । तर, सम्झौताबमोजिम समय–समयमा बुझाउनुपर्ने साँवा, ब्याजका साथै अन्य दस्तुर नतिरेको र सम्पूर्ण कर्जाको भाखासमेत नाघिसकेको लालीगुराँसले बताएको छ ।

ऋणी तथा जमानी सदस्य सृष्टिलाई सम्पूर्ण कर्जा रकम चुक्ता गर्न पटक–पटक मौखिक तथा लिखित रुपमा ताकेता गर्दासमेत संस्थाको कर्जा चुक्ता गर्नेतर्फ चासो नदेखाएको सहकारीको सूचनामा उल्लेख छ ।

तोकिएको समयमा ऋण चुक्ता नगरे ऋणी र जमानीको फोटोसहितको विवरण खुलाई ३५ दिनको सूचना प्रकाशन गर्ने प्रष्ट पार्दै लालीगुराँसले घरजग्गा लिलाम गर्ने चेतावनीसमेत दिएको छ ।