पाकिस्तानको बाढीमा साढे तीन करोड मानिस प्रभावित, ११ सयको मृत्यु
मुसलधारे वर्षापछिको बाढीले एक तिहाइ भाग डुबानमा पर्दा पाकिस्तानमा ११ सय मानिसको ज्यान गएको छ । बढीले साढे तीन करोड मानिस प्रभावित भएको स्थानीय सञ्चार माध्यमहरुले जनाएका छन् ।
मृत्यु हुनेमा तीन सय ८० बालबालिका छन् । भारी मनसुनपछिको विनाशकारी बाढीले घर, व्यवसाय, पूर्वाधार र अन्नबाली ध्वस्त पारेको छ । वर्षाले देशको एक तिहाई भूभाग जलमग्न भएको पाकिस्तानकी जलवायुमन्त्रीले बताएकी छन् । ‘देशको एक तिहाई भाग पानीमा डुबेको छ’, जलवायु परिवर्तनमन्त्री सेरी रिहमानले भनिन् । वर्षा छिट्टै कम हुने सम्भावना नरहेको उनले बताइन् ।
एक दशकयताको बाढीले १० अर्ब डलरभन्दा बढी क्षति पुर्याएको सरकारले प्रारम्भिक अनुमान गरेको छ । तर, यो क्षति अनुमान गरेभन्दा बढी हुन सक्ने प्रधानमन्त्री सहबाज सरिफले बताएका छन् ।
मानव निर्मित जलवायु परिवर्तनको असरसँग जुध्न पाकिस्तानलाई सहयोग गर्ने विश्वको दायित्व भएको सरकारको भनाइ छ । बाढीले बिचल्लीमा परेका पर्यटकसहित तीन सय जनालाई हेलिकोप्टबाट उद्धार गरिएको छ । सेनाको हेलिकप्टरले अलपत्र परेका परिवारको उद्धारसँगै खाद्यान्नका प्याकेटहरू दुर्गम क्षेत्रमा खसालेको छ ।
पाकिस्तानको बाढीलाई ‘अप्रत्याशित जलवायु विपत्ति’ भन्दै राष्ट्रसंघले सहयोगका लागि आह्वान गरेको छ ।
टिप्पणीहरू