व्यथा एउटा दबाई अर्को, एमालेमा कारबाही चर्को

‘टिकट पाए जित्छु, नपाए जिताउँछु’ भन्ने अध्यक्षको निर्देशनसहित स्थानीय चुनावी मैदानमा ओर्लिएको एमालेभित्र अहिले सोही चुनावताका अन्तर्घात गरेको भन्दै कारबाहीको कोतपर्व शुरु भएको छ ।

यसै सिलसिलामा लुम्बिनी प्रदेश कमिटीका ४१ जना सदस्यलाई केरकार गर्न थालिएको छ । सो कमिटीका अध्यक्ष राधाकृष्ण कँडेलले अध्यक्ष ओलीको निर्देशानुसार कथित अन्तर्घातीलाई तह लाउन छानबिन प्रक्रिया अघि बढाएको बताइन्छ । यसबाट केही नेता पार्टी पलायन गर्ने कि भित्रै अन्तरसंघर्ष गरेर बस्ने भन्ने अवस्थामा पुगेका छन् ।

विशेष गरी १० भाइ निकट भनेर चिनिएकालाई पाखा लगाउने अवसरको रूपमा यो कारबाही अघि बढाइएको स्रोतको दाबी छ । कारबाहीको सूचीमा राखिएका प्रादेशिक सदस्यहरूलाई प्रशिक्षण र विस्तारित बैठकमासमेत सहभागी गराइएको छैन ।

सफाइको मौकासमेत नदिई छापामार शैलीमा अघि बढाइएको कारबाही प्रक्रियाको शिकार हुनेमा तानसेनका निवर्तमान नगर प्रमुख अशोक शाही, उपमेयर लक्ष्मीदेवी पाठक, जिल्ला समन्वय समितिकी उपप्रमुख नीरा मरासिनीलगायत छन् ।

अभियोग लगाइएकाहरूलाई के विषयमा, किन भन्ने सूचनासमेत नदिई गरिएको यो कारबाहीले आपसी अविश्वास शुरु भएको छ । यसैबीच एक हप्ताअघि मात्रै कारबाहीकै सूचीमा रहेका लालबाबु दर्लामीलाई भने माफी माग्न लगाइएको छ । एमालेबाट कारबाहीको सुइँको पाएका रामबहादुर रावल भने माओवादी केन्द्रमा प्रवेश गरेर प्रदेश सह–इन्चार्जको जिम्मेवारी लिन सफल भएका छन् ।

पार्टीभित्रको यो कारबाहीलाई १० भाइ निकटलाई तह लगाउने अवसरका साथै उपाध्यक्ष विष्णु पौडेल र महासचिव शंकर पोखरेल गुटबन्दी र टकरावको रूपमा समेत हेरिएको छ । गत चुनावमा ती दुई नेताले गोजीका मान्छेहरूलाई टिकट दिएको र एक अर्कालाई निचा गिराउने खेलका कारण स्थानीय चुनावमा अपेक्षित नतिजा नआएको बताइन्छ ।

धेरै नगरपालिकाको उपमेयर पदमा एमाले उम्मेदवारहरूले जित्नु तर मेयरमा हार्नु पर्ने कारण विश्लेषण गर्दा यो कुरा छर्लंग हुने दाबी स्रोतले गरेको छ । त्यसो त देशभरमैं एमालेबाट उठेकाहरूमध्ये मेयरमा ८३ जना, उप प्रमुखमा ११५ जना छन् । जसमध्ये लुम्बिनीभित्र मेयर हारेर उपमेयर जितेका तिलोत्तमा नगरपालिका, सिद्धार्थनगर नगरपालिका, बुटवल नगरपालिका, कञ्चन गाउँपालिकागायत छन् ।

उता उदयपुरको त्रियुगा नगरपालिका, बेलका नगरपालिका र कटारी नगरपालिकामा पनि मेयरहरू हारेर उपमेयरहरूले जितेको विषयमा दोषीको खोजी भइरहेको छ ।