चीनमा डाक्टरी गरेकालाई नेपालमा इन्टर्नसिप गर्न बाटो खुल्यो

कोरोनाले गर्दा वीचैमा पढाइ छोडेर चीनबाट फर्किएका एमबीबीएसका विद्यार्थीले अब नेपालमै इन्टर्नसिप गर्न पाउने भएका छन् । उनीहरुलाई अपुग प्रयोगात्मक अभ्यास तथा इन्टर्नसिप गरी दुई वर्षको चिकित्सकीय तालिमको व्यवस्था गर्न लागिएको हो ।

चिकित्सा शिक्षा आयोगको सहमतिमा नेपाल मेडिकल काउन्सिलले थप समय नेपालमै अध्ययन गराउनका लागि स्वास्थ्य तथा जनसंख्या मन्त्रालयमा पत्र पठाएको छ । एक वर्षे अनिवार्य इन्टर्नसिप ‘नेशनल गाइडलाइन फर मेडिकल इन्टर्नसिप ट्रेनिङ,२००७’ अनुसार वा विश्वविद्यालयले तोकेबमोजिम पूरा गर्नुपर्ने पत्रमा उल्लेख छ ।त्यसैगरी,उक्त कोर्शमा चार वटा प्रमुख विषयहरू मेडिसिन, सर्जरी,गाइनेअब्स र पिडियाट्रिक्स समावेश हुनुपर्नेछ ।

चीनमा अध्ययनरत चिकित्सा शिक्षाका विद्यार्थीहरूको अध्ययन अवधि र प्रमाणपत्र प्राप्त गर्ने समायवधिबारे कुनै द्विविधा भए काउन्सिल वा सम्बन्धित कलेजमा सम्पर्क गरी यथार्थ विवरण बुझी अपुग अध्ययन अवधि यकिन गरेर मात्र अध्ययन शुरू गर्न भनिएको छ ।

अबउप्रान्त कोभिडसँग सम्बन्धित रहेर विदेशमा अध्ययन गरेका विद्यार्थीको नेपालमा अध्ययन अध्यापन गर्ने विषय सम्बोधन नहुने जनाइएको छ । चीनमा एमबीबीएस गरेर फर्किएका विद्यार्थीले गत वर्षदेखि नेपालमै इन्टर्नसिप गर्न पाउनुपर्ने माग राख्दै आएका थिए ।