कित्ताकाटका बीच उपेन्द्र निकट यादवले जसपा छोडिन्
मन्त्री हेरफेरपछि असन्तुष्ट रहेकी जनता समाजवादी पार्टीकी केन्द्रीय सदस्य रेणु कुमारी यादवले पार्टीको सबै जिम्मेवारीबाट मुक्त हुने निर्णय गरेकी छिन् । अध्यक्ष उपेन्द्र यादवको ‘किचेन क्याविनेट’ सदस्यका रुपमा चिनिएकी उनले आज केन्द्रीय सदस्यसहित सबै जिम्मेवारीबाट राजीनामा दिएकी हुन् ।
पार्टी अध्यक्ष यादवलाई उनले बुझाएको राजीनामा पत्रमा व्यक्तिगत समस्याका कारण जिम्मेवारी छोड्नु परेको उल्लेख गरिएको छ । ‘जनता समाजवादी पार्टी (जसपा) नेपालसँगको पदीय जिम्मेवारीबाट अलग हुने निर्णयमा पुगेको छु । तसर्थ आजकै मितिदेखि लागू हुनेगरी पार्टीले मलाई दिएको सम्पूर्ण पदीय जिम्मेवारीहरू त्याग गरेको ब्यहोरा यहाँलाई जानकारी गराउँदछु’, राजीनामा पत्रमा भनिएको छ ।
आन्तरिक विवादका कारण फुटको नजिक पुगेको जसपाका दुई पक्षले अलग-अलग केन्द्रीय समिति बैठक बसेको सन्दर्भमा संस्थापन पक्षकी प्रभावशाली नेतृको आकस्मिक राजीनामालाई चासोका साथ हेरिएको छ ।
टिप्पणीहरू