प्रचण्डको बीऊले काम नगर्ने घनश्यामको ठोकुवा, हाइब्रिड बीऊ खोज्न आग्रह
पूर्वमन्त्री तथा एमाले नेता घनश्याम भुसालले एमालेमा माओवादीको बिउ छरेको भन्ने प्रचण्डको अभिव्यक्तिको खण्डन गर्नुभएको छ । एमालेमै रहेर वामपन्थी एकताको जमर्को गरिरहनु भएका उहाँले माओवादीको बीऊ एमालेमा नउम्रने दाबीसमेत गर्नुभयो ।
आज बिहान पार्टी मुख्यालय पेरिसडाँडामा विप्लव समूहका नेताहरुलाई माओवादी केन्द्रमा प्रवेश गराउँदै प्रचण्डले एमालेभित्र माओवादीको बीऊ रोपेको र छिट्टै उम्रने बताएपछि दिउँसो भुसालको कडा प्रतिक्रिया आएको हो । वरिष्ठ वामपन्थी नेता सिद्धिलाल सिंहको अभिनन्दन कार्यक्रममा बोल्दै उहाँले प्रचण्डको बुझाई ठीक नभएको समेत भन्नुभयो ।अब एमाले, माओवादी र समाजवादीको छुटाछुट्टै बीऊ नउम्रिने दाबी गर्दै भुसालले तत्कालीन नेकपाको बीउ उमार्नुपर्नेमा जोड दिनुभयो । ‘हामीले केही वर्ष अगाडि नेकपा नामको हाइब्रिड बीऊ बनाएका थियौँ तर हाम्रो वुद्धि नपुगेकाले बीऊको भकारीमा आगो लगायौँ । बीऊहरु अहिले पनि सुरक्षित छन्, त्यसलाई फेरि पनि हामीले नेकपाको हाइब्रिड बीऊ बनाएर एमाले, माओवादी, समाजवादी सबैको बीऊ एकै ठाउँमा उमार्न सक्नुपर्छ’, उहाँको भनाइ थियो ।
वाम तालमेल हुँदै एमाले र माओवादीबीचको एकतामा जोड दिँदै आउनुभएका भुसाल र २०७५ सालमा पार्टी एकता गर्ने निर्णयको स्वामित्व लिइरहनु भएका प्रचण्डको अभिव्यक्तिमा फरक देखिए पनि दुवैको सार भने कम्युनिष्ट एकताकै पक्षमा देखिन्छ । प्रचण्डको आजको अभिव्यक्ति पनि माओवादी धारहरुबीच मात्र नभई सवै वामपन्थी घटकसँग बृहत एकता गर्नुपर्ने आशय थियो ।
टिप्पणीहरू