आफ्नै कार्यक्रम कार्यकर्ताले बहिष्कार गरेपछि काँग्रेस उपसभापतिको उपदेश

नेपाली काँग्रेसका उपसभापति पूर्णबहादुर खड्काले आफ्नो पार्टीको एमालेभन्दा एक लाख ५० हजार भोट बढी आएको दाबी गरेका छन् । पार्टी कार्यकर्तालाई आज सुर्खेतमा प्रशिक्षण दिँदै उनले एमालेको भन्दा एक लाख ५० हजारबढी मत काँग्रेसले ल्याएको दाबी गरेका हुन् ।

उपसभापति खड्काले पार्टीभित्रका केही साथीहरुको कुण्ठाका कारणले केही ठाउँमा हार व्यहोर्नु परेको स्वीकार गर्दै भने, ‘हामी चार सयभन्दा बढी स्थानीय तहमा जित्ने थियौँ तर, केही साथीको कुण्ठाको कारणले हलो र सूर्यमा मत दिएर हराइयो । उहाँहरूले पार्टीको निर्णय कार्यान्वयन गर्नुभएन ।’

पार्टीले स्थानीय तहको निर्वाचनमा लोकप्रिय मत पाएकाले इमान्दार भएर लाग्नु पर्नेमा उपसभापतिले जोड दिएका छन् । पार्टीका कुनै पनि कार्यकर्तालाई, पार्टी र नेतृत्वप्रति विमति भएमा पार्टीमा बसेर छलफल गर्ने बानी बसाल्न निर्देशन पनि दिइएको छ ।

काँग्रेसीले अरूको गल्ती मात्र देख्ने भन्दै सभापति वा उपसभापतिसँग कोही कसैको विवाद भएको निहुँमा पार्टीमा दशकौंको लगानी गरेका साथीहरूले अरूलाई मतदान गर्न नहुने उनको तर्क छ । तर, उपसभापति खड्काको आजको कार्यक्रम संस्थापन पक्षका बाहेक अरूले बहिष्कार गरेका थिए ।