रवि लामिछानेको नयाँ पार्टीविरुध्द आज पाँचौ उजुरी

युरोपियन युनियनकै जस्तो झण्डा हालेर गत मङ्गलवार दर्ता भएको पूर्वसञ्चारकर्मी रवि लामिछानेको ‘राष्ट्रिय स्वतन्त्र पार्टी’बिरुध्द आज अर्को उजुरी दर्ता भएको छ । स्वतन्त्र उम्मेदवारी अभियानलगायत आजै दिउँसो अर्को उजुरी हाल्नेको संख्या ५ पुगेको छ ।

मंगलबार लामिछानेले पार्टी दर्ताको निवेदन दिएपछि भोलिपल्ट बुधबार स्वतन्त्र उम्मेदवारी अभियानले पार्टीको नामबाट ‘स्वतन्त्र’ शब्द हटाउन माग गर्दै उजुरी दिएकाे थियो । त्यसबाहेक अन्य व्यक्ति र समूहले पनि राजनीतिक दल स्वतन्त्र हुनै नसक्ने भन्दै उजुरी हालेका थिए । आज एउटासहित रविको पार्टीविरुध्द कूल पाँच वटा उजुरी परेको निर्वाचन आयोगले जनाएको छ।

प्राय: सबै उजुरीमा ‘राष्ट्रिय स्वतन्त्र पार्टी’ मा प्रयोग भएको ‘स्वतन्त्र’ शव्दले वास्तविक स्वतन्त्र व्यक्ति,समूह,संस्थालाई गम्भीर आघात पुगेको भन्दै दल दर्ता नगर्न माग गरिएको छ । तर, यतिधेरै उजुरीका बाबजुद आयोगले भने ‘राष्ट्रिय स्वतन्त्र पार्टी’ कै नाममा दल दर्ता गरिदिएको हो ।

लामिछानेले पार्टीको प्रवक्तासमेत तोकिसकेका छन् । २१ जनाको टिम रहने पार्टीमा डा. मुकुल ढकाल प्रवक्ता बनेका छन् । उनले रासकोट अस्पताल निर्माणमा लामिछानेलाई सघाएका थिए ।