ओलीलाई उल्टो नहिड्न रावलको सुझाव

नेकपा एमालेका नेता डा. भीमबहादुर रावलले स्थायी कमिटी सदस्य घनश्याम भुसालमाथि कारवाहीको प्रक्रिया थालिएकोप्रति प्रतिक्रिया दिँदै उल्टो बाटो नहिंड्न नेतृत्वलाई सचेत गराउनुभएको छ ।

आयोगले नेता भुसाललाई कारवाहीका लागि पार्टीमा सिफारिस गरेपछि उत्पन्न विवादतर्फ लक्षित गर्दै रावलको यस्तो प्रतिक्रिया आएको हो । उहाँले एकतावद्ध भएर पार्टीलाई अघि बढाउन पनि सुझाउनु भएको छ । आज बिहान ट्विट गर्दै रावलले पार्टीमा भएका कमिकमजोरिको संस्थागतरुपमा गम्भीर समीक्षा गर्नुपर्नेमा जोड दिनुभएको हो ।

‘देश, जनता र पार्टीलाई एकताबद्ध र बलियो बनाई राष्ट्रिय स्वाधीनता, स्वाभिमान एवं संविधान, सिद्धान्त र लोकतन्त्रको रक्षा गर्नु आजको आवश्यकता हो,’ रावल भन्नुहुन्छ, ‘यसका लागि आगामी चुनाव जित्नुपर्छ । कमजोरीको संस्थागतरूपमा गम्भीर समीक्षा गरी बाटो तय गर्नुपर्छ । यसो नगरी उल्टो बाटो हिँड्दा झन् पराजय हुन सक्छ ।’

नेता भुसालले स्थानीय तह निर्वाचनमा एमाले पराजित हुनुको नैतिक जिम्मेवारी अध्यक्ष ओलीले लिनुपर्ने बताउनुभएको थियो । उहाँले पार्टी अध्यक्ष ओलीको ‘म’वादका कारण चुनावमा पराजय व्यहोर्नुपरेको पनि भन्नुभएको थियो । भुसालको यो अभिव्यक्तिपछि अध्यक्ष ओलीको आलोचना गरेको भन्दै अनुशासन आयोगले कारबाही सिफारिस गरेको हो ।