चौधरीको दुवै रिट खारेज,बिजुली गाडीमा तोडियो मोनोपोली

उच्च अदालत,पाटनले विवादास्पद व्यापारी तथा डलर अर्बपति विनोद चौधरीको सिजी मोटर्स प्रालिले दायर गरेको दुवै रिट खारेज गरेको छ । न्यायाधीशद्धय ब्रजेश प्याकुरेल र बासुदेव न्यौपानेको संयुक्त इजलासले आज दुवै रिट खारेजीको फैसला सुनाएको हो । 

अटोमोबाइल्स क्षेत्रमा अन्य कम्पनीलाई भित्रिन नदिन सिजी मोटर्सले मुद्दा हालेर सरकारी निकाय र विदेशी कम्पनीलाई दुःख दिइरहेको थियो । उच्चले मुद्दा खारेज गरेसँगै अन्य कम्पनीलाई गाडी ल्याउन बाटो खुलेको छ । 

यही गाडी प्रकरणमा बिनोदले आफ्नै भान्जाको समेत गाँस खोसेर दिदीको घरमा रुवावासी गराएका थिए । 

२०८० माघ ९ गते सिजी मोटर्सले विद्युतीय भ्यान आयातका लागि वाणिज्य,आपूर्ति तथा उपभोक्ता संरक्षण विभागबाट अनुमति लियो । ‘केवाईसी ईलेक्ट्रिक प्यासेन्जर भ्यान’ को आयातका लागि सिजी र चीनको वाङजोऊ जिल्लास्थित ‘चोङछिङ चाङएन कुवायु अटोमोबाइल्स कम्पनी लिमिटेड’ बीच सन् २०२२ जुलाई ७ मा सम्झौता भयो ।

सम्झौताको म्याद सन् २०२७ डिसेम्बर ३१ सम्म छ । वर्षेनि ५७६ वटा भ्यान ल्याएर बिक्री गर्ने सहमति भएकोमा सन् २०२५ को जुनसम्म दुई हजार २६९ वटा भ्यान बेचेको सिजीको दाबी छ । २०२७ सम्म गाडी आयात गर्ने सम्झौता भएकोमा सिजीले बीचमा एकाएक आयात रोक्यो । त्यसपछि सो चिनियाँ कम्पनीले सिजीलाई पत्र लेख्यो ।

सम्झौता उल्लंघन भएको भन्दै पत्र पठाएकोमा सिजीले सन् २०२५ जुन ९ मा पहिल्यै आयात गरेको गाडी बाँकी रहेकाले जुलाईको अन्तिमसम्म प्रतितपत्र (एलसी) खोल्ने भनी जवाफ पठायो । सम्झौताको बर्खिलाप भएको भन्दै चिनियाँ कम्पनीले सिजीलाई सम्झौता तोडेको पत्र लेख्यो । त्यसपछि सो कम्पनीले ईलेक्ट्रिक ड्रिम्स मोबिलिटी प्रालिसँग केवाईसी ईलेक्ट्रिक भ्यान आयातका लागि एक वर्षको सम्झौता गर्यो ।

काठमाडौंको टेकुमा कार्यालय रहेको सो प्रालिले आपूर्ति विभागबाट एजेन्सी लियो । आफूले भ्यान आयातको एजेन्सी पाएकोमा अर्कोलाई दिएर आपूर्ति विभागले कानुनको गम्भीर उल्लंघन गरेको भन्दै सिजी मोटर्सले उच्च अदालत,पाटनमा २०८२ साउन १४ गते मुद्दा दायर गर्यो ।

सिजीले वाणिज्य,आपूर्ति तथा उपभोक्ता संरक्षण विभाग,बबरमहललाई विपक्षी बनाएर मुद्दा हालेको हो । त्यसपछि पुनः कात्तिक २ गते भन्सार विभागसमेतलाई विपक्षी बनाएर अर्को मुद्दा हालियो । आजको संयुक्त इजलासले दुवै रिट खारेज गरिदिएको छ ।
यही गाडी प्रकरणमा बिनोदले आफ्नै भान्जाको समेत गाँस खोसेर दिदीको घरमा रुवावासी गराएका थिए ।