राजावादीको आन्दोलनले सरकार डराएको विनाको जिकिर, सुहाङले सम्झिए बुबा

राष्ट्रिय प्रजातन्त्र पार्टीका सांसद विना लामाले पूर्व राजाको स्वागतमा देखिएको समर्थकको भीडबाट गणतन्त्रवादी नेताहरु डराएको जिकिर गरेकी छन् । 

आजको प्रतिनिधि सभा बैठकमा मन्त्री उपस्थित नहुँदा १५ मीनेट स्थगित गरिएपछि फेरि बसेको बैठकमा लामाले यस्तो टिप्पणी गरेकी हुन् । ‘राजसंस्था पक्षधरको जनलहरको एक धक्काले हो कि मन्त्रीहरू नै गायब भएको’, उनले भनिन्, ‘तर, आउनुभयो, उहाँहरूलाई स्वागत छ, अलि जिम्मेवार बन्नुपर्‍यो !’ 

उपप्रधानमन्त्री तथा शहरी विकासमन्त्री प्रकाशमान सिंह र सञ्चार तथा सूचना प्रविधिमन्त्री पृथ्वीसुब्बा गुरुङकाे उपस्थितिपछि बैठक सुचारु भएको हो । त्यसअघि माओवादी केन्द्रका प्रमुख सचेतक हितराज पाण्डेले त्यसबारे सभामुखको ध्यानाकर्षण गराएका थिए । 

यता, एमाले सांसद सुहाङ नेम्बाङले पूर्व सभामुख तथा बुबा सुवासचन्द्र नेम्बाङलाई सम्झिएका छन् । उनले भने, ‘आज बुबाको जन्मदिनमा उहाँले इलाम बजारको लागि देखेको सपना पूरा गर्न म सरकारको ध्यानाकर्षण गराउन चाहन्छु ।'